Innlent | mbl | 27.11.2024 | 11:06 | Uppfært 11:38

Hætt við því að vegir teppist á kjördag

Úrkomuspáin á landinu klukkan 12 á kjördag. Kort/Veðurstofa Íslands

Einar Sveinbjörnsson veðurfræðingur segir að veðurspárnar fyrir kjördag, 30. nóvember, séu að verða nokkuð ljósar.

Einar segir að skörp skil fari yfir austanvert landið á laugardaginn og spár geri ráð fyrir talsvert mikilli ofankomu eða allt að 40 millimetrum þar sem mest verður á Austurlandi. Hann segir að hríðin skelli á Austurlandi snemma morguns á laugardaginn og það muni snjóa allan daginn í norðaustan allhvössum vindi.

Óvissan er meiri um hversu hratt þetta gengur yfir

„Óvissan er kannski meira hversu hratt þetta gengur yfir og hvað veðrið muni ná yfir stóran hluta landsins. Hvort það nái suður til Hornafjarðar og austan til á Norðurlandi. Veðrið gengur niður seint á laugardagskvöldið en það má eiginlega segja að þetta óveður hitti akkúrat á kjördaginn,“ segir Einar við mbl.is.

Hann segir að veðrið ætti hvorki að hamla einu né neinu á Suður- og Vesturlandi en spár gera ráð fyrir éljagangi á Norðvesturlandi og á Vestfjörðum.

Frétt af mbl.is

Ekki greiðfært á kjörstað ef spáin gengur eftir

Einar segir að hætt sé við því að fjallvegir á Norðaustur- og Austurlandi geti teppst og þó svo að Vegagerðin reyni að halda vegum opnum þá verður ofankoman það mikil og blinda að vandræði geti skapast á vegum. Hann segir að það eigi sérstaklega við fjallvegi eins og á Möðrudalsöræfum, Fjarðarheiði og víðar.

„Það er alltaf ákveðin áhætta með kosningar að vetrarlagi og það er alveg óhætt að segja að það sé mikil áskorun til staðar á mörgum vígstöðvum.“

Eins og mbl.is hefur greint frá gæti veðrið haft mikil áhrif á komandi kosningar.

„Ef það þarf að fresta kosningu, í einhverri kjördeild einhvers staðar á landinu, þá er ekki hægt að telja annars staðar og birta úrslitin,“ sagði Ari Karlsson, formaður yfirkjörstjórnar í Norðvesturkjördæmi.

Frétt af mbl.is

Koma fyrstu tölur á sunnudagskvöldið?

Einar er veðurfræðingur Vegagerðarinnar, sem mun standa í ströngu að halda vegum opnum á kjördag, og þá heldur hann úti vefsíðunni Blika.is sem rýnir í allt það sem tengist veðri.

Þar kemur fram að samkvæmt spá Evrópsku reiknimiðstöðvarinnar sé gert ráð fyrir hríðarveðri á Austurlandi frá því síðla nætur og fram á kvöld á kjördag. Þar segir að lægðin sé heldur vestar en í spá gærdagsins og miðað við þessa aðalspá muni hríðarveðrið ná einnig til Hornafjarðar og allt suður í Öræfi.