Einn festist í rútu sem fór út af

Einn einstaklingur festist í rútu sem fór út af við Fróðárheiði á Snæfellsnesi fyrr í dag. Hann ásamt öðrum var fluttur á sjúkrahús með þyrlu Landhelgisgæslunnar.

Þetta staðfestir Ásmundur Kristinn Ásmundsson, yfirlögregluþjónn á Vesturlandi.

„Það er flughált og mikið rok og hún fer þarna út af og einn farþegi festist,“ segir Ásmundur í samtali við blaðamann mbl.is.

Frétt af mbl.is

Þrír fluttir á sjúkrahús með þyrlum Gæslunnar

Fjölskylda yfirgaf sjálf vettvang

Hann segir restina af farþegunum, sem námu um 25 manns, hafa verið flutta í fjöldahjálparmiðstöð Rauða krossins á Ólafsvík. Þaðan sé verið að flytja fjóra einstaklinga á slysadeild.

Ein fjölskylda hafi sjálf yfirgefið vettvang áður en að björgunaraðila bar að garði. Þau virðist hafa húkkað sér far á hótel í Borgarnesi en viðbragðsaðilar hafi síðar náð sambandi við þau til að kanna hvort væri í lagi með þau.

Kveðst Ásmundur ekki hafa upplýsingar um hvort um innlenda eða erlenda ferðamenn hafi verið að ræða en að málið sé nú í rannsókn.

Lögreglan á Akranesi og Borgarnesi, sjúkralið, Landhelgisgæslan og björgunarsveitirnar Brák og Lífsbjörg hafi sinnt viðbragðsstörfum.

Frétt af mbl.is

Rútuslys á Vesturlandi – Tvær þyrlur kallaðar út

• Blogga um frétt