Innlent | mbl | 30.11.2024 | 15:06

Íslendingum bregður við biðröðum á kjörstað

Loka þurfti kjörstað í Kringlunni fyrr í dag til að stemma af atkvæði. mbl.is/Ólafur Árdal

Loka þurfti kjördeild í Kringlunni í 15 til 20 mínútur rétt eftir hádegi í dag til að stemma af atkvæði. Á sama tíma mættu óvenju margir kjósendur á kjörstað í einu, sem varð til þess að nokkur röð myndaðist og þurftu einhverjir að bíða dágóða stund.

Leifur Valentín Gunnarsson, formaður kjörstjórnar í Reykjavíkurkjördæmi suður, segir ekki óvenjulegt að slíkt gerist og að vel hafi gengið að stemma af.

mbl.is/Ólafur Árdal

„Það gerist oft í kosningum að það þarf að loka til að stemma af og kanna bókhaldið. Við þurfum að loka í korter, tuttugu mínútur og þá kom auðvitað hrúga af kjósendum inn. Það þurfti eitthvað fólk að bíða sem er alltaf leiðinlegt, en mér skilst að fólki hafi verið boðið upp á kaffi og að tylla sér í stóla. Og að þetta hafi bara verið leyst nokkuð vel, þó það sé aldrei skemmtilegt að fólk þurfi að bíða lengi,“ segir Leifur í samtali við mbl.is

„Auðvitað er mikilvægt að skoða bókhaldið, finna hvað þarf að stemma af þannig það sé hægt að halda kjörfundi áfram,“ bætir hann við.

Frétt af mbl.is

Kjósendur mögulega seinni af stað eftir gleðskap

„Við erum mjög góðu vön“

Eva Helgadóttir, formaður yfirkjörstjórnar í Reykjavík, segir Íslendinga vera svo góðu vanir að þeim bregði við þegar þeir þurfi að bíða á kjörstað. Betra sé hins vegar að loka í smá stund til að stemma af, sé það talið nauðsynlegt.

„Við hvetjum kjörstjórnirnar allar til þess að stoppa frekar, fara yfir, anda rólega. Þó að kjósendur þurfi að bíða í nokkrar mínútur, þá þykir það ekkert tiltökumál,“ segir Eva.

„Við sjáum víða í útlöndum langar biðraðir af kjósendum að kjósa en hér þekkjum við varla slíkt, enda bregður öllum þegar það þarf að bíða smá. Við erum mjög góðu vön.“