Innlent | mbl | 30.11.2024 | 19:35 | Uppfært 19:55

Meinaður aðgangur þegar hann mætti í peysunni

Egill fékk lánaða úlpu sem hann gat skellt yfir sig og fékk þá að kjósa. mbl.is/Eggert Jóhannesson

„Þetta var nú bara allt til gamans gert. Ég vissi í raun ekki að ég mætti ekki mæta í merktum klæðnaði. Þá væri ég ekki að mæta svona,“ segir Egill Trausti Ómarsson sem mætti í peysu merktri Sjálfstæðisflokknum á kjörstað í morgun.

Ljósmyndari mbl.is var á staðnum og smellti mynd af honum.

Upphaflega ætlaði Egill að mæta á kjörstað í jakkafötum en datt í jólaskap í morgun og snérist hugur.

Starfsfólk brást skjótt við

Starfsfólk á kjörstað brást skjótt við uppákomunni strax í anddyrinu og meinaði honum aðgang að sjálfum kjörstaðnum, enda óheimilt að mæta fatnaði merktum stjórnmálaflokkum á kjörstað og telst það áróður.

„En ég grínaðist bara með að þeir þyrftu að redda mér úlpu yfir og þeir gerðu það. Ég fór í úlpu yfir og allir sáttir, og fékk kaffi í leiðinni,“ segir Egill, en eftir það gat hann kosið án vandkvæða.

Eina jólapeysan sem hann á

Hann segist hafa lært af reynslunni og að þetta komi ekki fyrir aftur.

„Ég veit það þá bara næst þegar ég ætla að ganga inn í kjörklefann að það verður þá ekki eins augljós merking eins og hægt er. Á kjördag á bara að vera gaman, ég held að það hafi enginn tekið þetta alvarlega,“ segir Egill.

„Þetta var ekki planað, ég ætlaði að mæta í jakkafötum, með nælu samt, en þetta þróaðist bara svona,“ útskýrir hann.

„Ég byrjaði að hlusta á jólalög í morgun þegar ég var að gera kaffið mitt, og þetta er jólapeysa Sjálfstæðisflokksins, eina jólapeysan sem ég á, og mér leið bara leið svo jólalega og var í stemningu.“