Innlent | mbl | 2.12.2024 | 14:10 | Uppfært 15:41

Þorgerður Katrín: Ekki eins flókið og sýnist

Hátt í þrjú hundruð manns mættu á kosningauppgjör Spursmála sem efnt var til á Reykjavik Hilton Nordica í gærkvöldi, tæpum sólarhring eftir að kjörstöðum lokaði hringinn í kringum landið.

Þótti við hæfi að ljúka umfjöllun um kosningabaráttuna með þessum hætti þar sem Spursmál hafa reynst einn virkasti og spennuþrungnasti vettvangur baráttunnar allt frá því að Bjarni Benediktsson, forsætisráðherra sleit ríkisstjórnarsamstarfi Sjálfstæðisflokks, Framsóknarflokks og VG um miðjan október.

Góðir gestir mættu í sófann á Reykjavik Hilton Nordica í gærkvöldi. mbl.is/Ólafur Árdal

Þau sem ráða munu för

Kallaðir voru til öflugir álitsgjafar og fólk sem mun með virkum hætti hafa áhrif á það hvernig stjórnarmyndunarviðræðum mun vinda fram.

Fyrst kom á svæðið Inga Sæland sem vann sterkan sigur með Flokki fólksins en flest bendir til þess að hún verði við samningaborðið í fyrstu lotu viðræðna um stjórnarmyndun frá miðju og til vinstri. Með henni í sófann mætti Andrés Magnússon, fulltrúi ritstjóra á Morgunblaðinu en hann rýndi sérstaklega í þær tölur sem blöstu við að lokinni talningu.

Frétt af mbl.is

„Þú ert að taka mig á taugum“

Að því spjalli loknu mættu þau Snorri Másson, nýbakaður þingmaður Miðflokksins og Þorgerður Katrín Gunnarsdóttir, formaður Viðreisnar. Hún er af mörgum talin líklegust til þess að hreppa sigursveiginn, þ.e. embætti forsætisráðherra enda er ljóst að flokkur hennar getur næsta auðveldlega hallað sér til hægri jafnt sem vinstri í ljósi niðurstöðu kosninganna.

Fullyrti Þorgerður Katrín í samtalinu að stjórnarmyndunarviðræður ættu alls ekki að verða jafn flóknar og margir vilja vera láta. Á það eftir að koma í ljós á allra næstu dögum og vikum.

Inga Sæland sló á létta strengi en er núna í lykilstöðu við stjórnarmyndunarviðræður. mbl.is/Ólafur Árdal

Andstæðingum hvalveiða varpað fyrir borð

Að lokum fékk Stefán Einar til skrafs og ráðagerða þá Gísla Frey Valdórsson, ritstjóra Þjóðmála og Vilhjálm Birgisson, formann Starfsgreinasambandsins. Hafði Vilhjálmur sérstaklega á orði að þeir flokkar sem hefðu barist hvað hatrammast gegn hvalveiðum væru nú dottnir út af þingi og fagnaði hann því einarðlega. Segir hann næstu stjórn eiga að snúast um verðmætasköpun sem nýtast megi þjóðinni allri.

Gísli Freyr ræddi stöðuna út frá öðrum sjónarhornum en sagði meðal annars að Vinstri grænum hefði ekki verið hafnað vegna stjórnarsamstarfsins sem nú er á enda runnið, heldur vegna þeirrar stefnu sem þeir hafa talað fyrir af mikilli einurð.

Þorgerður Katrín mætti galvösk og sigurreif að loknum kosningunum. mbl.is/Ólafur Árdal

Samtalið birt á vefnum

Kosningauppgjörið var tekið upp og er nú birt á mbl.is þeim til glöggvunar sem ekki áttu heimangengt á þennan stórskemmtilega viðburð sem sóttur af af fjölbreyttum hópi fólks, ungum og öldnum og stuðningsmönnum ólíkra flokka.