Skýr krafa að launafólk taki ekki áfram byrðarnar

„Ég tek við góðu búi, þetta er geysilega öflugt félag og rosalega kröftug skrifstofa,“ segir Halla Gunnarsdóttir sem tók við sem formaður VR í dag, þegar Ragnar Þór Ingólfsson lét formlega af störfum eftir að hafa verið kjörinn á þing fyrir Flokk fólksins.

Halla hefur verið varaformaður VR í tæp tvö ár og því starfað við hlið Ragnars Þórs í þeim verkefnum sem áhersla hefur verið á innan félagsins. Hún hefur verið starfandi formaður VR síðasta mánuðinn, eða frá því Ragnar Þór fór í framboð til Alþingis.

„Ragnar þór er búinn að vera hérna lengi og hefur sett mark sitt á þetta starf. Hluti af þeim verkefnum sem ég tek við núna eru þær áherslur sem hann hefur sett og þá horfi ég sérstaklega á húsnæðismálin. Þar er auðvitað búið að byggja upp íbúðafélagið Blæ og fyrstu íbúðirnar verða afhentar núna í janúar,“ segir Halla.

Frétt af mbl.is

Halla tekur við af Ragnari Þór

Mikill styrkur af fólki í verkalýðshreyfingunni 

Einnig verði þeim kjarasamningum sem undirritaðir voru í mars fylgt eftir, sem og skuldbindingum stjórnvalda.

„Síðan varðandi það sem við höfum verið að gera síðustu vikur, þá höfum við verið að setja mikinn fókus á niðurskurðarpólitík. Við munum fylgja því mjög kröftuglega eftir núna þegar við fylgjumst með stjórnarmyndunarviðræðum og nýju þingi fóta sig af stað,“ segir Halla

„Það er algjörlega skýr krafa okkar í VR að launafólk verði ekki látið halda áfram að taka allar byrðarnar af efnahagsástandinu,“ bætir hún.

Halla telur mikinn styrk fólginn í því fyrir VR að Ragnar Þór sé kominn á þing og að hans flokkur, Flokkur fólksins, sé hugsanlega á leið í ríkisstjórn. 

„Það er mikill styrkur að hafa fólk sem hefur reynslu úr verkalýðshreyfingunni inni á þingi.“

Frétt af mbl.is

Þyrfti viðhorfsbreytingu frá Sjálfstæðisflokki og Miðflokki

Mikilvægt að ná stjórn á húsnæðismálum

Þá ber Halla væntingar til þess að ný stjórnvöld takist á við þann veruleika sem blasi við í landinu. Mikilvægt sé að ná stjórn á húsnæðismálunum.

„Kosningabaráttan hefur einkennst alltof mikið af einhverju tali um að ná jöfnuði í ríkisfjármálum, en það sem þarf auðvitað að gera er að ná stjórn á húsnæðismálum í landinu. Það þarf að koma til móts við þessa hópa sem hafa verið að taka á sig mjög þungar byrðar út af hávaxtastefnunni. Það finnst mér vera stóru verkefnin. Svo hefur maður auðvitað áhyggjur af ásælni einkaaðila í ríkissjóð,“ segir Halla.

Hún vonast til að þessi mál verði efst á blaði í þeim stjórnarmyndundarviðræðum sem framundan eru hjá Samfylkingunni, Viðreisn og Flokki fólksins.

Halla mun gegna formennsku í VR út kjörtímabilið sem lýkur á aðalfundi félagsins í mars á næsta ári. En hún hyggst svo gefa kost á sér til áframhaldandi formennsku.

Frétt af mbl.is

„Höfum ákveðið að hefja viðræður“

• Blogga um frétt