Innlent | Morgunblaðið | 13.12.2024 | 10:48

Fótboltavöllur fer undir skóla

Knattspyrnuvöllur Þróttar er fjölsóttur af börnum og ungmennum í Laugardal, en hætt er við að hann heyri brátt sögunni til.

Knattspyrnuvöllur Þróttar stendur á lóðinni í Laugardal sem borgaryfirvöld áforma að byggja á nýjan safnskóla fyrir nemendur á unglingastigi, en völlurinn er á svokölluðum „þríhyrningi“ sem er á milli Skautahallarinnar og félagsheimilis Þróttar.

„Þetta svæði, sem við köllum í dag Miðheima, erum við með samning um frá 1996 og gildir svo lengi sem Þróttur er með starfsemi í Laugardalnum,“ segir Jón Hafsteinn Jóhannsson, framkvæmdastjóri Knattspyrnufélagsins Þróttar, í samtali við Morgunblaðið.

Taka á skólann í notkun 2030

Svo sem frá hefur verið greint hefur ákvörðun skóla- og frístundaráðs Reykjavíkurborgar, um að hætta við að reisa viðbyggingar við skólana þrjá sem fyrir eru í hverfinu en byggja þess í stað safnskóla fyrir börn á unglingastigi, verið umdeild og hafa foreldrar barna í skólunum þremur; Laugalækjarskóla, Laugarnesskóla og Langholtsskóla, mótmælt þeim harðlega.

Gert er ráð fyrir því að safnskólinn verði tekinn í notkun árið 2030.

Jón Hafsteinn segir að ef koma eigi til einhverjar breytingar á íþróttaaðstöðu félagsins í Laugardal verði að nást samkomulag um það við félagið.

Lesa má nánar um málið í Morgunblaðinu í dag