Þjónustukjarni fyrir þá sem sæta öryggisvistun

Starfshópur um úrbætur á úrræðum og þjónustu vegna einstaklinga sem þurfa að sæta sérstökum öryggisráðstöfunum telur nauðsynlegt að byggður verði miðlægur þjónustukjarni.

Þetta kemur fram í tilkynningu á vef Stjórnarráðsins.

Starfshópurinn er skipaður fulltrúum frá alls sjö ráðuneytum og í dag kynnti hann fyrir ríkisstjórn minnisblað.

Í minnisblaðinu eru tillögur til úrbóta fyrir einstaklinga sem hafa brotið af sér en eru ýmist dæmdir sakhæfir og hætta talin stafa af þeim eftir afplánun, dæmdir ósakhæfir, eða talið að refsing muni ekki bera árangur og sæta því öryggisráðstöfunum og viðeigandi meðferð.

Nauðsynlegt að samhæfa þjónustu

Starfshópurinn telur nauðsynlegt að samhæfa þjónustu og úrræði vegna þessara einstaklinga en að málum kemur fjöldi ráðuneyta auk sveitarfélaga.

„Áskoranir stjórnvalda snúa ekki síst að ómarkvissri þjónustu og skorti á búsetuúrræðum fyrir einstaklinga sem hafa fengið dóm eða úrskurð um öryggisgæslu. Þá er talin þörf á skýrari ábyrgð og lagaumgjörð um framkvæmd vægari öryggisráðstafana, meðal annars til að tryggja réttaröryggi eftir að afplánun í fangelsi lýkur,“ segir í tilkynningunni.

Til að bregðast við framangreindu gerir starfshópurinn eftirfarandi tillögur:

• Byggður verði upp miðlægur þjónustukjarni allra ábyrgðaraðila með samþættri þjónustu á einum stað.
• Stofnuð verði stigskipt sérhæfð úrræði á grundvelli dóma og úrskurða, áhættumats og mats á þjónustuþörf þar sem öryggis verði gætt. Samþætt félags- og geðheilbrigðisþjónusta verði veitt á viðeigandi hátt á hverju þjónustustigi.
• Unnið verði lagafrumvarp um framkvæmd öryggisráðstafana og viðeigandi breytingar gerðar á almennum hegningarlögum, lögum um heilbrigðisþjónustu og fleiri lögum.
• Eftirlit með úrræðum verði bætt og reglulegt endurmat á öryggisráðstöfunum tryggt.

Breyta þurfi fyrirkomulagi fyrir börn og ungmenni

Hópurinn áréttar einnig að breyta þurfi fyrirkomulagi þjónustu við börn með fjölþættan vanda þannig að rétt úrræði séu fyrir hendi þegar þeirra er þörf.

„Rannsóknir sýni fram á að með markvissri snemmtækri íhlutun sé hægt að koma í veg fyrir fjölgun einstaklinga sem þurfa á öryggisráðstöfunum að halda á fullorðinsárum,“ segir í tilkynningunni.

• Blogga um frétt