Aldrei gengið svona hratt

Franska forlagið Ed­iti­ons Métailié í Par­ís hefur tryggt sér útgáfuréttinn á nýjustu skáldsögu Halldórs Armands, Mikilvægu rusli. Verður það önnur bók höfundarins sem kemur út þar í landi en Bróðir kom út hjá sama forlagi árið 2022.

„Þetta leggst einstaklega vel í mig,“ segir Halldór. „Það hefur aldrei gengið svona hratt fyrir sig hjá mér að selja bók til útlanda; venjulega er þetta lengra ferli. Þessi tíðindi koma líka á góðum tíma en ég var að missa þessi blessuðu listamannalaun.“

Honum er ekki kunnugt um hvenær Mikilvægt rusl kemur út í Frakklandi en telur þó líklegt að það verði á næsta ári. „Bróðir fékk fína dóma í Frakklandi og bæði Le Monde og Le Figaro kölluðu mig einn eftirtektarverðasta höfund minnar kynslóðar hér en ég veit ekki hvernig salan gekk. En alla vega nógu vel til að þeir veðji á mig aftur.“

Sami þýðandi verður að verki nú og áður, Jean-­Christoph Salaün. „Hann er algjör snillingur og ég gæti ekki verið í betri höndum.“

Armand er vitaskuld franskt nafn en langalangamma Halldórs var þaðan. „Sjálfur fór ég í skiptinám til Spánar, sem var eftir á að hyggja tóm vitleysa. Ég hefði átt að fara til Frakklands og læra frönsku. Það fer að koma tími á það.“