Innlent | mbl | 16.12.2024 | 16:45

Ríkisstjórnarsamstarfið gæti súrnað hratt

Snorri Másson þingmaður Miðflokksins segir að þrátt fyrir að stjórnarmyndunarviðræður Samfylkingar, Viðreisnar og Flokks fólksins virðast ganga vel þyki sér ekki ólíklegt að sjálft ríkisstjórnarsamstarfið geti súrnað hratt.

„Mér finnst ýmislegt benda til þess að þetta gæti alveg súrnað með tímanum og jafnvel hratt og orðið flókið að hafa stjórn á þessum hópi í sameiningu í gegnum alls konar áskoranir sem blasa við. Ég veit ekkert hvernig það mun ganga, það getur enginn spáð fyrir um það, en maður getur ekki gefið sér að það verði jafn ljúft og þægilegt og einhverjar viðræður kunna að ganga,“ segir Snorri í nýjasta þætti Dagmála.

Snorri mætti í þáttinn ásamt Dagbjörtu Hákonardóttur, þingmanni Samfylkingarinnar, og fór samtalið um víðan völl.

Hitamál í samfélaginu krufin

Hugnast borgaraleg ríkisstjórn

Í þættinum minntist Snorri á það að honum hugnaðist best borgaraleg ríkisstjórn Miðflokks, Sjálfstæðisflokks og Viðreisnar.

Spurður hvort að það yrði einfalt fyrir þá flokka að koma sér saman um mál eins og útledningamálin og Evrópusambandsmálin segir Snorri að það væri hægt að ná lendingu í þeim málum.

„Það er náttúrluega eins með þetta, að þá myndi fólk finna út úr því í þessum viðræðum og það er kannski það sem fólk er að reyna gera núna,“ segir hann og bætir við:

„Ég held að það væri töluverður möguleiki að ná fínum lendingum í þeim málum.“

Ræddu ýmis hitamál

Snorri og Dagbjört ræddu ýmis hitamál á borð við útlendingamál, rétttrúnað, stöðu vinstrisins, umhverfismál og nýlegt bann Breta við veitingu kynþroskabælandi lyfja til barna.

Áskrifendur Morgunblaðsins geta horft á þáttinn í heild sinni með því að smella hér.

Inga Sæland, formaður Flokks fólksins, Kristrún Frostadóttir, formaður Samfylkingarinnar og Þorgerður Katrín Gunnarsdóttir, formaður Viðreisnar. mbl.is/Eyþór