Álagið dreifist á fleiri daga

Lögreglan á höfuðborgarsvæðinu viðhafði sérstakt eftirlit með umferð í og í kringum kirkjugarðana á aðfangadag enda talsverð umferð í kringum þá og færð og veður ekki með besta móti.

Pétur Sveinsson í umferðardeild segir umferðarstýringu hafa gengið vel eins og yfirleitt sé raunin á þessum degi.

„Þetta hefur breyst töluvert á undanförnum árum og álagið hefur dreifst. Það var alltaf þannig að fólk beið eftir aðfangadegi en síðastliðin ár höfum við tekið eftir því að fólk er að fara í garðana dagana fyrir jól og í raun hvenær sem er á aðventunni.“