Ísland tekur sæti í mannréttindaráði Sameinuðu þjóðanna

Ísland tók formlega sæti í mannréttindaráði Sameinuðu þjóðanna nú um áramótin og mun sitja í ráðinu í samtals þrjú ár, eða til loka árs 2027. 

Frá þessu er greint á vef Stjórnarráðsins en þar segir að auk Íslands taki sautján önnur ríki sæti í mannréttindaráði Sameinuðu þjóðanna um áramótin.

Þetta er í annað sinn sem Ísland er kosið til setu í mannréttindaráði Sameinuðu þjóðanna en Ísland tók síðast sæti með skömmum fyrirvara sumarið 2018 þegar Bandaríkin sögðu sig úr ráðinu og sat þá í ráðinu út kjörtímabilið, til loka árs 2019.

Munum láta að okkur kveða í baráttunni 

„Ísland fær það ábyrgðarmikla verkefni að vera meðal aðildarríkja mannréttindaráðs Sameinuðu þjóðanna á tímum þar sem sótt er að mannréttindum um heim allan. Á þessum þremur árum munum við láta að okkur kveða í baráttunni og tala hátt og skýrt fyrir því að öll ríki heims standi við alþjóðlegar mannréttindaskuldbindingar svo að við fáum öll notið sjálfsagðra réttinda og frelsis,” segir Þorgerður Katrín Gunnarsdóttir utanríkisráðherra. 

Hún segir að auk þess að leggja kapp á að efla stoðir og samstöðu um grundvallarmannréttindi allra er ætlunin að leggja sérstaka áherslu á jafnréttismál, réttindi hinsegin fólks, réttindi barna og umhverfismál.

Mannréttindaráð Sameinuðu þjóðanna í Genf var sett á fót árið 2006 og tók við hlutverki mannréttindanefndar Sameinuðu þjóðanna sem starfaði frá 1946. Hlutverk ráðsins er að efla og vernda mannréttindi í aðildarríkjum Sameinuðu þjóðanna, fjalla um mannréttindabrot, beina tilmælum til einstakra ríkja um úrbætur í mannréttindamálum og fjalla um einstök þematísk réttindamál. 

• Blogga um frétt