Mesta vatnshæð frá upphafi mælinga

Vatnshæðarmælir Veðurstofunnar á stíflu Flóaáveitunnar nærri Brúnastöðum í Flóahreppi sýndi í gærkvöldi að vatnshæðin var orðin meiri en hæð stíflunnar og því var farið að flæða yfir hana.

Er þetta mesta vatnshæð sem mælst hefur á þessum stað frá því að mælingar hófust árið 2009, að því er segir í tilkynningu Veðurstofunnar.

Línurit sem sýnir vatnshæð við stíflu Flóaáveitunnar frá 30. desember. Graf/Veðurstofa Íslands

Frétt af mbl.is

Óbreytt staða í Hvítá

Aukið frost um helgina

Frá 30. desember hefur ísstífla verið að byggjast upp í Hvítá nærri Brúnastöðum og Flóaáveituskurðinum.

Vatn byrjaði að flæða upp úr árfarveginum síðdegis í gær. Rennur vatn bæði meðfram og yfir inntak Flóaáveituskurðsins. Hluti vatnsins rennur yfir Brúnastaðaflatir.

„Veðurspá gerir ráð fyrir auknu frosti um helgina sem getur haft áhrif á þróun ísstíflunnar. Flóðahætta gæti aukist við skyndilegar veðurbreytingar eða áframhaldandi hækkun vatnshæðar,“ segir í tilkynningu Veðurstofunnar.

Frétt af mbl.is

Hvítá flæðir yfir bakka sína

Gæti valdið vandræðum á þjóðvegi 1

Veðurstofan segir að erfitt sé að spá fyrir um hver þróunin verði. Áfram verði vel fylgst með aðstæðum.

Vegna kólnandi veðurs fram undan er líklegt að áfram verði ísmyndun í ánni. Þó er mögulegt að áin finni sér farveg undir ísinn og bræði hann jafnt og þétt af sér, segir í tilkynningu.

„Ef snöggar breytingar verða í veðri á meðan ísstífla er enn í ánni getur skapast aukin flóðahætta á svæðinu.“

Það geti þýtt að vatn flæði yfir vegi sem liggja heim að bænum nærri ánni. Ef vatnshæð heldur áfram að hækka í Flóaáveituskurðinum gæti það valdið vandræðum á Þjóðvegi 1 austan við Selfoss.

• Blogga um frétt