Ekki lengur starfsmenn Vegagerðarinnar

Vegagerðin segir þá einstaklinga sem eru sakaðir um bruðl á almannafé í tillögum um aukna ráðdeild í ríkisrekstri ekki lengur starfsmenn stofnunarinnar. Ákveðnar áskoranir hafi blasað við í rekstri vinnuflokka Vegagerðarinnar.

Þetta kemur fram í svari stofnunarinnar vegna fréttar á mbl.is.

Í þætti Spursmála var fjallað um tillögu manns sem starfaði á vitasviði Vegagerðarinnar árið 2021. Full­yrðir hann að yf­ir­maður sinn, sem hann ekki nafn­grein­ir, hafi mis­farið með op­in­bert fé, bæði í formi notk­un­ar á bif­reið í op­in­berri eigu, en einnig með því að hafa of­skráð yf­ir­vinnu­tíma og dag­pen­inga.

Frétt af mbl.is

Sakar yfirmann hjá Vegagerðinni um fjárdrátt

Fjallar ekki um einstök mál starfsmanna

„Vegagerðin tekur fram að þeir einstaklingar sem um ræðir í athugasemdinni eru ekki lengur starfsmenn Vegagerðarinnar. Eðli málsins samkvæmt getur Vegagerðin ekki farið ofan í einstök mál starfsmanna,“ segir í svarinu.

„Almennt má segja að ákveðnar áskoranir hafi blasað við í rekstri vinnuflokka Vegagerðarinnar sem tekið hefur verið á. Þessi úrlausnarefni sneru almennt að rekstri, uppbyggingu þekkingar og aðbúnaði en einnig að stjórnun.“

Frétt af mbl.is

Biðja almenning um tillögur um hagræðingu

Þá segir að brúarvinnuflokkar Vegagerðarinnar standi á gömlum grunni og gegni lykilhlutverki, bæði í flóknum viðhaldsverkefnum og því viðbragði sem nauðsynlegt er vegna náttúruhamfara er tengjast jökulám.

Þessir flokkar hafi á liðnum árum verið endurskipulagðir með hliðsjón af kröfum tímans um starfsemi af þessari gerð.

Vitavinnuflokkurinn lagður niður

Hins vegar sé vitavinnuflokkur stofnunarinnar af öðrum toga en þar var jafnan mikið um sumarstarfsmenn sem unnu að viðhaldi á vitum yfir sumartímann. Við yfirferð og stefnumótun á starfsemi tengdri viðhaldi vita var niðurstaðan sú að leggja þennan flokk af í þeirri mynd sem hann var rekinn.

„Þau verkefni sem að honum sneru verða leyst á fjölbreyttan máta með liðsinni starfsfólks Vegagerðarinnar og verktaka á hverju svæði fyrir sig,“ segir að lokum.

Frétt af mbl.is

Yfir þúsund tillögur borist frá almenningi

• Blogga um frétt