Innlent | mbl | 6.1.2025 | 15:26

Veðbankar blanda sér í formannsslaginn

Sum nöfn á lista Epicbet koma minna á óvart en önnur. Samsett mynd

Í kjölfar tilkynningar Bjarna Benediktssonar um að hann sækist ekki eftir áframhaldandi formennsku í Sjálfstæðisflokknum hefur veðbankinn Epicbet sett upp stuðla svo hægt sé að veðja á það hver taki við keflinu í Sjálfstæðisflokknum. Meðal þeirra sem hægt er að veðja á er fótboltasérfræðingurinn Hjörvar Hafliðason.

Stuðullinn segir til um ávöxtun peningsins sem veðjað er á ákveðinn frambjóðanda, það er að segja því lægri sem stuðullinn er þeim mun líklegra er talið að frambjóðandinn hljóti kjör.

Þórdís Kolbrún R. Gylfadóttir, varaformaður Sjálfstæðisflokksins, og Áslaug Arna Sigurbjörnsdóttir eru með stuðulinn 3,0. Guðlaugur Þór Þórðarson er með stuðulinn 3,5 og Guðrún Hafsteinsdóttir er með stuðulinn 6,5.

Frétt af mbl.is

Bjarni hættir á þingi og fer ekki í formannskjör

The Succession pic.twitter.com/0uTnF1jbl3
— Epicbet (@epicbetisland) January 6, 2025

„Dramatík í pólitíkinni“

Daði Laxdal, framkvæmdastjóri viðskiptaþróunar hjá EpicBet, segir í samtali við mbl.is að stuðlarnir muni „klárlega breytast“ fram að landsfundinum sem á að fara fram í lok febrúar.

Heldurðu að fólk hafi áhuga á því að veðja á formannskjör í stökum flokkum?

„Ég held að þetta verði mjög vinsælt. Veðmáladagatalið er þannig að það er alltaf eitthvað í gangi, í íþróttum það er að segja. Það er samt nýtt af nálinni að það virðist vera dramatík í pólitíkinni endalaust líka. Viðskiptavinunum finnst þetta svakalega gaman,“ segir Daði.

Stuðullinn á Hjörvar Hafliðason 500

Jens Garðar Helgason, oddviti Sjálfstæðisflokksins í Norðausturkjördæmi, er með stuðulinn 7,5 og Ólafur Adolfsson, oddviti Sjálfstæðisflokksins í Norðvesturkjördæmi, er með stuðulinn 15.

Önnur áhugaverð nöfn eru á listanum eins og Elliði Vignisson bæjarstjóri Ölfuss, Heiðrún Lind Marteinsdóttir, framkvæmdastjóri Samtaka fyrirtækja í sjávarútvegi, Ásdís Kristjánsdóttir bæjarstjóri Kópavogs og Halldór Benjamín Þorbergsson forstjóri Heima.

Athygli vekur að hægt er að veðja á það að Hjörvar Hafliðason fótboltasérfræðingur verði næsti formaður flokksins en stuðullinn á hann er 500.