Innlent | Morgunblaðið | 8.1.2025 | 9:20

Bændur enn rólegir á Mýrum

Fjölskyldan að Staðarhrauni hefur búið þar frá árinu 2021. Ljósmynd/Guðdís Jónsdóttir

„Ég heyrði svona drunur í húsinu,“ segir Jakob Arnar Eyjólfsson, bóndi á Staðarhrauni við mynni Hítardals, þegar hann lýsir upplifun sinni af því þegar stærsti skjálftinn reið yfir í Ljósufjallakerfinu helgina fyrir jól, en sá átti upptök sín við Grjótarvatn og mældist 3,2 að stærð.

„Ég fann töluvert meira fyrir skjálftunum í Grindavík rétt áður en það fór að gjósa þar,“ segir Jakob. Bændur á Mýrum í Borgarfirði eru ekki sérlega órólegir þrátt fyrir jarðhræringar og óróapúls.

Frétt af mbl.is

Bárðarbunga byrstir sig: Stærsti skjálfti ársins

Jakob býr á bænum með konu sinni Guðdísi Jónsdóttur, dótturinni Arndísi Ingu og syninum Ara. Þau eru með búskap, bæði kýr og kindur, sem að sögn Jakobs er ekki stór í sniðum. „Ég er reyndar að breyta núna, stækka fjósið og fjölga kúnum.“ Íbúðarhúsið byggði afi Jakobs á sínum tíma alveg við jaðarinn á gömlu hrauni og því segir hann það óskemmtilega tilhugsun að kerfið láti kræla á sér. Hann er ekki farinn að huga að neinum ráðstöfunum þótt nágrannarnir hafi grínast með það sín á milli að festa kaup á ýtu og fara að ryðja upp varnargörðum.

Lesa má meira um málið í Morgunblaðinu í dag