Andlát: Hrafnhildur Guðfinna Thoroddsen

Hrafnhildur Guðfinna Thoroddsen lést á Landspítalanum í Fossvogi 16. janúar sl., 51 árs að aldri.

Hrafnhildur fæddist í Reykjavík 18. apríl 1973. Foreldrar hennar eru Auður Guðjónsdóttir skurðhjúkrunarfræðingur, f. 1948, og Ólafur E. Thoroddsen hæstaréttarlögmaður, f. 1945, d. 2023, þau skildu.

Hrafnhildur lauk hefðbundinni skólagöngu frá Grunnskólanum á Seltjarnarnesi og stúdentsprófi frá Menntaskólanum við Hamrahlíð árið 2002. Hún lenti í alvarlegu bílslysi árið 1989 og lamaðist fyrir neðan mitti. Árin 1995 og 1996 kom hingað til lands kínverskur skurðlæknir, Zhang Shaocheng, og gerði tilraunaaðgerðir á Hrafnhildi ásamt Halldóri Jónssyni bæklunarlækni, þáverandi yfirlækni bæklunardeildar Landspítalans, sem fólust í því að tengja millirifjataugar fram hjá mænuskaðanum og tengja þær ásamt taugabút úr fæti við mænutaglið.

Eftir þetta fór Hrafnhildur í nokkrar læknismeðferðir til Rússlands, Frakklands og Bretlands. Gat hún þá gengið í spelkum fyrir neðan hné í göngugrind. Svo kom að beinþynningunni sem allir lamaðir fá. Hún fór að brotna á fótum og þegar hún hafði brotnað sex sinnum ákvað hún að setjast alfarið í hjólastólinn.

Árið 2007 setti hún á fót, ásamt móður sinni og öðrum, Mænuskaðastofnun Íslands sem hefur það hlutverk að vekja athygli á mænuskaða og þrýsta á að lækning finnist við honum. Hrafnhildur starfaði á ýmsum stöðum en lengst af í Íþróttahúsi Seltjarnarness.

Seinni maður Auðar er Bjarni Halldórsson skipstjóri, f. 1944. Eldri systir Hrafnhildar er Ólöf Jónína Thoroddsen hönnuður, f. 1969, og á hún tvö börn. Yngri systir Hrafnhildar er Guðrún Dóra Bjarnadóttir geðlæknir, f. 1982, og á hún þrjú börn.

Útför Hrafnhildar fer fram föstudaginn 24. janúar frá Neskirkju við Hagatorg kl. 13. Þeim sem vilja minnast hennar er bent á Mænuskaðastofnun Íslands, kt. 411007-1030, reikn. 311-26-81030.