Ummæli Ingu standast ekki skoðun

Ummæli Ingu Sæland, formanns Flokks fólksins og ráðherra, um að stærri flokkar en Flokkur fólksins hafi ekki haldið landsfund í fimm ár standast ekki skoðun, að minnsta kosti ekki í seinni tíð.

Flokkur fólksins hélt síðast landsfund undir lok september árið 2019, það er annar landsfundur frá stofnun flokksins en sá fyrri var haldinn ári fyrr. Á sjötta ár hefur því liðið frá síðasta landsfundi en flokkurinn hefur nú boðað til fundar með minnsta mögulega fyrirvara, þremur vikum, á samfélagsmiðlinum Facebook.

Í samþykktum flokksins er kveðið á um að landsfundur skuli haldinn þriðja hvert ár.

Frétt af mbl.is

Ætla ekki að skila peningnum

Kóvid og kosningar ástæða frestunar

Blaðamaður spurði Ingu í vikunni hverju því sætti að landsfundur flokksins hefði dregist svo mjög.

„Við vorum nú 2019 með fund en svo gerðist líka annað dulítið sem hét kóvid, og við vorum nú sérstaklega að ganga fram í því að reyna að koma í veg fyrir að dreifa smitum. Nú síðan kom árið 2023 og landsfundur var auglýstur í fyrra, eins og ég segi, og er frestað þangað til á næsta ári. Og það er nú ekki bara Flokkur fólksins sem að hefur ekki haldið landsfund í fimm ár, það eru stærri flokkar en við sem eiga líka slíka sögu,“ svarði Inga.

Það hefur svo sem gerst af ýmsum ástæðum að landsfundir flokka séu haldnir síðar en samþykktir kveða á um. Það átti ekki síst við þegar kórónuveirufaraldurinn geisaði en margir flokkar frestuðu fundi á þeim tíma. Þá frestuðu nokkrir flokkar landsfundi í vetur vegna óvæntra alþingiskosninga.

Frétt af mbl.is

Styrkveiting í trássi við lög

Ekki sambærilegt við aðra flokka

Vandamálið við skýringar Ingu á áralöngum töfum fundarins er að samkvæmt samþykktum flokksins hefði landsfundur átt að fara fram árið 2022. Öllum takmörkunum vegna faraldursins var aflétt í febrúar árið 2022 og því hefði ekkert átt að vera því til fyrirstöðu að halda fundinn það ár. Ekki frekar en árið 2023 eða árið 2024, en ekki var boðað til kosninga fyrr en í október það ár.

Allir aðrir flokkar hafa enda haldið landsfund frá því að faraldrinum lauk, sumir flokkar fleiri en einn.

Inga vísar líklega með orðum sínum til þess að fjögur ár liðu milli landsfunda Sjálfstæðisflokksins á árunum 2018-2022. Samkvæmt skipulagsreglum flokksins á landsfundur að jafnaði að fara fram annað hvert ár og hefði því að öllu jöfnu átt að fara fram árið 2020, en það ár skall faraldurinn á og samkomutakmarkanir voru meira og minna við lýði allt fram í febrúar árið 2022, og hélt flokkurinn landsfund það ár.

Í samþykktum flestra flokka er kveðið á um að landsfundur skuli haldinn annað hvert ár, en Píratar og Sósíalistar halda landsfund árlega. Flokkur fólksins er einn flokka með tíðni landsfunda samkvæmt samþykktum sem nemur meira en tveimur árum.

• 1 blogg um fréttina

Bloggað um fréttina

• Óðinn Þórisson: Eldhús Ingu Sæland