Boðar allar samninganefndirnar á fund
Setja bókamerki
Magnús Þór Jónsson, formaður Kennarasambands Íslands, hefur boðað allar samninganefndir aðildarfélaga sambandsins til fundar klukkan eitt í dag þar sem farið verður yfir stöðuna í kjaradeilu kennara við ríki og sveitarfélög.
Þetta staðfestir hann í samtali við mbl.is, en hann kveðst ekki vilja tjá sig frekar fyrr en að loknu samtali samninganefndanna.
Hann gerir ráð fyrir að Kennarasambandið muni senda frá sér einhverja yfirlýsingu síðar í dag, en ljóst er að deilan er öll í hnút.
Kennarar þurfi að slá af kröfunum
Inga Rún Ólafsdóttir, formaður samninganefndar Sambands íslenskra sveitarfélaga, sagði í samtali við mbl.is í gær að viðhorfsbreytingu þyrfti hjá kennurum til að væri að setjast aftur að samningaborðinu.
Sveitarfélögin hefðu teygt sig eins langt og þau gætu til að koma til móts við kennara, en þeir yrðu að slá af launakröfum sínum ættu samningar að nást.
Þá sagði hún ýmis lagaleg atriði í skoðun í tengslum við verkfallsboðanir kennara, sem hún gat ekki upplýst frekar um.
Verkföll hefjast 3. febrúar
Síðasti fundur samninganefndanna var á miðvikudag og var þá reynt til þrautar að finna einhvern grundvöll til frekara samtals. Ríkissáttasemjari sagði það ekki hafa tekist og því sæi hann ekki tilefni til að boða til fundar að svo stöddu.
Að öllu óbreyttu hefjast því verkfallsaðgerðir á ný mánudaginn 3. febrúar og kennarar í fjórtán leikskólum og sjö grunnskólum leggja þá niður störf.
Þá hefur Félag framhaldsskólakennara gefið út að farið verði í atkvæðagreiðslu um ótímabundin verkföll í nokkrum framhaldsskólum, eftir að friðarskyldu lýkur um mánaðamótin.
Stefnan foreldrum „til skammar og minnkunar“
Björn segir af sér stjórnarformennsku
Jóvin veldur usla: Mesti vindhraði í sögu landsins
Bráðabirgðalögbann á Trump
Kennarar hafi ekki svarað foreldrum
Nítján vélum Icelandair seinkaði