Með þeim stærri sem hafa mælst

Síðasta sólarhring hafa mælst rúmlega tíu jarðskjálftar rétt austan við Vestri Hvalhnúk, sá stærsti 3,0 að stærð, sem mældist 5,5 kílómetrum suðsuðsuðvestur af Bláfjallaskála rétt eftir klukkan 6 í morgun.

Veðurstofunni hafa ekki borist neinar tilkynningar frá fólki sem fann fyrir skjálftanum að sögn Böðvars Sveinssonar, náttúruvársérfræðings á Veðurstofu Íslands, en annar skjálfti af stærðinni 2,4 mældist skömmu síðar á sömu slóðum.

Böðvar segir að síðustu tvo sólarhringa hafi mælst um 30 skjálftar á þessu svæði. Hann segir þetta þekkt skjálftasvæði en tæplega 400 skjálftar hafa mælst á svæðinu á undanförnum fimm árum.

Hann segir að í flestum tilvikum hafi verið um litla skjálfta að ræða en skjálftinn í morgun hafi verið með þeim stærri sem hafi mælst.

Frétt af mbl.is

Þriggja stiga skjálfti nærri Bláfjöllum

• Blogga um frétt