Innlent | mbl | 27.1.2025 | 15:25

Hefta þarf aðgengi barna að klámi

Öll dreifing kláms er ólögleg hérlendis en bann við dreifingu kláms er að finna í almennum hegningarlögum. Ljósmynd/Colourbox

Ísland stendur framarlega meðal Norðurlanda er kemur að löggjöf er varðar bann við dreifingu á kynferðislegu efni í óþökk þeirra sem í því birtast. Íslensk löggjöf hefur þó ekki tekið til þess að hefta aðgengi barna að klámi, slík löggjöf er meðal annars í gildi í Danmörku.

Stígamót unnu í samstarfi við sænsku og norsku kvenréttindasamtökin skýrslu þar sem þetta kemur fram. Nokkur ríki innan Evrópusambandsins vinna nú að því að þrýsta á samevrópskar reglur til þess að hefta aðgengi barna að klámi.

Löggjöf gömul og sjaldan beitt

Öll dreifing kláms er ólögleg hérlendis en bann við dreifingu kláms er að finna í almennum hegningarlögum. Sambærilega löggjöf er að finna á öllum Norðurlöndunum nema í Danmörku. Löggjöfin er hins vegar gömul og henni er sjaldan beitt hérlendis sem og á Norðurlöndunum.

„Það þarf að fara að skoða hvort að það sé tilefni til þess að uppfæra þessi lög. Við erum með lög sem banna dreifingu á nektarmyndum eða hótanir um slíkt, við stöndum okkur vel í því. Við vitum betur hver skaðsemin getur verið af klámi og þá sér í lagi hjá börnum og okkar ósk hjá Stígamótum er að við heftum aðgengi að klámi á meðal barna, sem eru auðvitað með óþroskaðan heila,“ segir Drífa Snædal, talskona Stígamóta, í samtali við mbl.is.

Drífa Snædal, talskona Stígamóta Ljósmynd/Aðsend

Dönum ekki heimilt að framfylgja sinni löggjöf

Danir hafa einir Norðurlanda sett löggjöf sem stuðlar að því að hefta aðgengi barna að klámi. Evrópusambandið hefur hins vegar komið í veg fyrir það að Dönum sé heimilt að framfylgja þeirri löggjöf að sögn Drífu.

„Danir fengu athugasemdir frá Evrópusambandinu varðandi löggjöfina og Danir hafa því ekki getað beitt henni til þessa. Þetta snerist um það að gerð var krafa um auðkenningu til þess að hægt væri að nálgast efni á klámsíðum. Danir og Frakkar herja nú að Evrópusambandinu af þessum ástæðum.“

Ofbeldi sem kemur beint úr klámi

Rannsóknir sem gerðar hafa verið benda til þess að karlar sem neyta kláms séu líklegri til þess að gera lítið úr ofbeldi gegn konum og verði sjálfir árásargjarnari. Drífa segir að ofbeldi sem beitt sé hérlendis komi í auknum mæli beint úr klámi.

„Ráðgjafar Stígamóta taka eftir því í auknum mæli að verið sé að beita ofbeldi sem kemur beint úr klámi. Ákveðnar bylgjur koma fram í ofbeldi sem bendir til þessa. Meðal annars sjáum við að verið er að beita kyrkingum, en slíkt kemur beint úr klámi.“

Drífa segist ekki hafa heyrt afstöðu nýrrar ríkisstjórnar um það hvort að breyta eigi löggjöf í þessum efnum en segir þó að almennt finni hún fyrir því í samfélaginu að aukinn vilji sé fyrir því að vernda börn.