Innlent | mbl | 31.1.2025 | 15:31

Fuglainflúensa greindist í ref

Refurinn sem felldur var í Skagafirði vegna gruns um fuglainflúensu greindist jákvæður. Ljósmynd/Ingólfur Davíð Sigurðsson

Fuglainflúensa H5N5 greindist í ref úr Skagafirði í vikunni. Þetta kemur fram í tilkynningu frá Matvælastofnun.

Matvælastofnun bárust niðurstöður rannsókna tilraunastöðvar Háskóla Íslands að Keldum á sýnum sem tekin voru úr ref sem aflífaður var í Skagafirði fyrr í vikunni.

Vera vakandi fyrir óeðlilegri hegðun

Íbúi tók eftir að refurinn var augljóslega veikur en hann var mjög slappur, hreyfði sig lítið og var valtur á fótum.

Tilkynnt var um refinn til Matvælastofnunar og reyndar refaskyttur fengnar til að aflífa hann. Hræið var sent til rannsókna og greindist hann með fuglainflúensu af gerðinni H5N5.

Í ljósi þess vill Matvælastofnun biðja fólk að vera vakandi fyrir sjúkdómseinkennum eða óeðlilegri hegðun í refum og senda stofnuninni tilkynningu ef það verður vart við veika eða dauða ref, að því er segir í tilkynningunni.

Frétt af mbl.is

Einstaka tilfelli í haust en nú fjöldadauði

Fleiri spendýr geta smitast

Þá bendir stofnunin á að fleiri spendýr, svo sem rottur og mýs, geti smitast af fuglainflúensu, þótt veiran hafi ekki greinst hingað til í þessum dýrategundum hér á landi.

Matvælastofnun vill benda á að það er varasamt vegna smithættu að taka mýs og halda þær í búrum innanhúss eins og því miður komi fyrir, auk þess sem það sé óheimilt samkvæmt lögum um velferð dýra og það sama eigi við um öll önnur villt dýr.

Ef vart verður við óeðlilegan dauða í músum og rottum skal það tilkynnt til Matvælastofnunar.

Skilaboð til katta- og hundaeigenda eru þau að smithætta er enn til staðar og æskilegt að þeir reyni áfram að koma í veg fyrir að dýr þeirra fari í veika eða dauða villta fugla eða spendýr.

Frétt af mbl.is

Fuglaflensa: Fólk haldi köttum innandyra

Sýkingin ekki í rénun

Tilkynningum sem berast Matvælastofnun um dauða og veika villta fugla hefur fækkað og fuglainflúensa hefur ekki greinst í þeim sýnum úr fuglum sem rannsökuð hafa verið síðustu daga.

„Matvælastofnun telur ekki tímabært að álykta að sýking í villtum fuglum sé í rénun og biður fólk að vera áfram vakandi fyrir sjúkdómseinkennum í fuglum og að tilkynna stofnuninni um veika og dauða fugla sem það sér,“ sem segir í tilkynningunni.

Tilkynna skal um veik eða dauð villt spendýr og fugla með því að smella á hnappinn ábendingar og fyrirspurnir efst á heimasíðu Matvælastofnunar, mast.is.

Mikilvægt er að tilkynningunni fylgi nákvæmar upplýsingar um staðsetningu og best er að skrá hnit staðarins. Nauðsynlegt er að taka fram hvaða fugla- eða dýrategund er um að ræða og/eða láta mynd fylgja með tilkynningunni.

Mælaborðið Matvælastofnunar um fuglainflúensu hefur verið uppfært. Þar má finna upplýsingar um allar tilkynningar auk upplýsinga um sýnatökur og niðurstöður rannsókna.