Innlent | Morgunblaðið | 31.1.2025 | 6:00

Íþróttafélög fara á hausinn

Íþróttastarfi fylgir gjarnan gleði, en mikilvægt er að fylgja öllu opinberu regluverki sem um það gildir eins og nú er lögð mikil áhersla á. mbl.is/Eyþór

„Kröfum Skattsins um að þau sem fyrir íþróttafélög starfa verði launþegar en ekki verktakar fylgir kostnaðarauki sem þau standa ekki undir. Félögin fara að óbreyttu á hausinn,“ segir Þórhildur Garðarsdóttir, formaður Knattspyrnufélags Reykjavíkur (KR).

Skattyfirvöld sendu á dögunum erindi á þau íþróttafélög í landinu sem eiga lið í efstu og næstefstu deildum karla og kvenna í fót-, hand- og körfubolta. Farið er þess á leit að leikmenn og þjálfarar sem starfa fyrir félögin verði og séu launþegar en ekki verktakar sem fá greiðslur samkvæmt innsendum reikningum. Einnig er tekið fram að íþróttafélög og starfsemi þeirra verði tekin til sérstakrar skoðunar Skattsins, enda séu vísbendingar um vanhöld í skilum þeirra á staðgreiðslu af launum og fleiru.

Skattamálið hefur komið af stað umróti hjá íþróttafélögunum, fundað hefur verið og leitað lausna. „Eigi nú að gera kröfur til íþróttafélaga sem skapa frekara umstang í rekstri þeirra, flækja mál og auka kostnað skapast aðstæður sem munu hafa mikil áhrif. Íþróttastarf er dagleg barátta um að láta hlutina ganga upp með sem minnstum tilkostnaði. Ekki er heldur hægt að sækja meira í sjálfboðið fjáröflunarstarf,“ segir Jóhann Steinar Ingimundarson formaður UMFÍ.

Þetta er snúið mál

„Þetta er snúið mál,“ segir Þórhildur Garðarsdóttir hjá KR. Um 180 manns starfa fyrir félagið sem verktakar í ýmsum hlutverkum, svo sem leikmenn, þjálfarar og fleiri. Deildir félagsins séu alls 13 og hver þeirra sé eining með sjálfstæðan rekstur. Eigi að taka þá sem fyrir deildirnar starfa inn sem launþega þýðir það að hver deild þurfi að vera með sérstakt launabókhald auk þess sem til komi nýr launatengdur kostnaður svo sem orlof, veikindaréttur, desemberuppbót og svo framvegis.

„Flest þau sem starfa fyrir KR eru í annarri vinnu. Koma svo hingað inn tilfallandi eftir þeirri stundatöflu sem æfingatímarnir fylgja. Slík vinna hefur allan svip verktöku. Þau sem eru hins vegar í fullu starfi fyrir félagið eru að sjálfsögu launamenn,“ segir Þórhildur.

Lesa má meira um málið í Morgunblaðinu í dag