Innlent | mbl | 1.2.2025 | 10:25 | Uppfært 10:56

Bátur reif bryggjupolla af

Björgunarsveitarmenn taka á honum stóra sínum á Norðfirði í morgun þar sem bátur slitnaði frá bryggju og rak upp í hafnargarð. Ljósmynd/Slysavarnafélagið Landsbjörg

„Það er skítaveður,“ segir Jón Þór Víglundsson, upplýsingafulltrúi Slysavarnafélagsins Landsbjargar, af gangi mála í nótt og í morgun og segir mbl.is af helstu verkefnum björgunarsveita víða um land.

Í Bolungarvík fuku þakplötur af beitningaskúr í morgun og er verkefninu að mestu lokið að sögn upplýsingafulltrúans.

Í smábátahöfninni á Norðfirði slitnaði bátur frá bryggju með slíku offorsi að hann reif bryggjupolla með sér út í sjó áður en hann rak upp í hafnargarð og vinnur björgunarsveitin Gerpir í Neskaupstað nú að því að komast að bátnum og er björgunarskipið Hafbjörg á vettvangi til fulltingis.

Veðrið síðasta sólarhringinn hefur gert landsmönnum ýmsa skráveifuna og hafa björgunarsveitir víða sinnt útköllum. Ljósmynd/Slysavarnafélagið Landsbjörg

Hörfuðu undan snjóflóðum

Þá var björgunarsveitarfólk á Héraði kallað út í nótt eftir að ökumaður lítillar hópferðabifreiðar komst í hann krappan þar sem hann var á ferð með fólk um Fagradal og voru níu manns ferjaðir þaðan niður á Egilsstaði.

Eins og frá var greint í gærkvöldi féllu tvö snjóflóð úr Enninu við Ólafsvík og niður á veginn sem þar liggur um. „Þar var ekki hundrað prósent vitneskja um hvort fólk hefði lent í flóðinu, en talið var líklegt að svo væri ekki. Þegar mitt fólk kom á svæðið féll annað flóð svo það var ákveðið að hörfa og vera ekki með fólk á svæðinu á meðan staðan væri þessi,“ segir Jón Þór að lokum.