Segir dóminn vonbrigði og líklega áfrýjað

Sigurður G. Guðjónsson, verjandi Sverris Þórs Gunnarssonar, segir dóm yfir Sverri og viðskiptafélaga hans vera vonbrigði og telur líklegt að dóminum verði áfrýjað.

Fyrr í dag voru Sverrir, sem kenndur hefur verið við rafrettusjoppuna Drekann, ásamt Snorra Guðmundssyni, sem kenndur hefur verið í rafrettusjoppuna Póló, dæmdir í Héraðsdómi Reykjaness í tveggja ára skilorðsbundið fangelsi og til að greiða 1,1 milljarð í sekt í stóra sígarettusmyglmálinu svokallaða.

Voru þeir fundnir sekir um stórfelld tollalagabrot og að hafa komið sér hjá því að hafa greitt 740 milljónir í tolla og skatta vegna innflutnings á sígarettum og tóbaki á árunum 2015 til 2018. Voru vörurnar skráðar sem prótín eða pappír í tollskýrslum.

Frétt af mbl.is

Sverri og Snorra gert að greiða 1,1 milljarð

Um er að ræða í heild­ina 120.075 kart­on af síga­rett­um, eða 1.200.750 síga­rettupakka og 5.400 kart­on af reyktób­aki, en síðasta sendingin af níu sem dæmt var fyrir var gerð upptæk af tollyfirvöldum eftir að í ljós kom að hún innihélt ekki það sem kom fram á tollskýrslum.

„Mjög trúlegt að þessu verði áfrýjað“

„Mér þykir mjög trúlegt að þessu verði áfrýjað,“ sagði Sigurður við mbl.is strax eftir að dómurinn var fallinn.

„Það eru vonbrigði í fyrsta lagi að það virðist vera tekið gott og gilt að tóbaksgjaldið hafi verið réttilega lagt á og að það grundvalli þessa háu sektarefsingu og upptökukröfur,“ bætir hann við.

Ætluðu verjendur mannanna tveggja að skoða dóminn betur áður en þeir myndu tjá sig nánar um hann.

• Blogga um frétt