200 mílur | Morgunblaðið | 6.2.2025 | 10:37

Góð vertíðarbyrjun í Grindavík

Sjávarsíðan Landað úr Páli Jónssyni í Grindavíkurhöfn á mánudaginn. Aflinn eftir einnar viku túr var 122 tonn eða 385 kör, sem hlýtur að teljast gott. Ljósmynd/Jón Steinar Sæmundsson

„Útlitið er ágætt. Í þessum róðri ætlum við að halda okkur hér við Reykjanesið enda er þorskurinn nú að færa sig til vesturs með suðurströndinni, eins og jafnan gerist á þessum árstíma. Vetrarvertíðin fer vel af stað,“ segir Benedikt Páll Jónsson, skipstjóri á Páli Jónssyni GK í samtali við Morgunblaðið. Báturinn fór út á mánudagskvöld og skipverjar verða að fram á helgina.

„Síðasti túr var fínn. Þá vorum við hér á Meðallandsbugtinni fyrir austan og þetta gekk fínt. Við náðum 122 tonnum af fiski eða 385 körum og að uppistöðu var þetta þorskur, stór og fallegur fiskur og meðalþyngd hvers þeirra var 8 kíló. Þetta gerist ekki betra,“ segir skipstjórinn.

„Við erum býsna bjartsýn á næstu mánuði, enda þótt margir þættir þurfi að fara saman,“ segir Sigurður Arnar Kristmundsson, hafnarstjóri í Grindavík, í samtali við Morgunblaðið.

Landaður afli í Grindavík í janúar síðastliðnum var 1.900 tonn í 53 löndunum. Aflann lögðu upp að stofni til nokkrir litlir línubátar, þrjú skip Vísis og jafn margir togarar þeirra þriggja félaga sem áður mynduðu Þorbjörn hf.

Nánar má lesa um vertíðarbyrjunina í Grindavík í Morgunblaðinu.