Innlent | mbl | 10.2.2025 | 13:00 | Uppfært 14:05

Alfreð var sakaður um nauðgun

Alfreð Erling Þórðarson var sakaður um nauðgun árið 2020 en neitaði sök og taldi son þeirra látnu hafa verið geranda í málinu. Hér má sjá sækjanda í málinu. mbl.is/Karítas

Verslunareigandi í Neskaupstað segir að Alfreð Erling Þórðarson hafi verið sakaður um nauðgun haustið 2020. Alfreð er ákærður fyrir að verða hjónum að bana með hamri í Neskaupstað 21. ágúst á síðasta ári.

Aðalmeðferð hófst í Héraðsdómi Reykjavíkur í dag.

Verslunareigandi gaf skýrslu fyrir dómi í dag og sagði Alfreð hafa verið reiðan að vera borinn röngum sökum í nauðgunarmálinu. Sagði hann að Alfreð hafi talið að sonur hjónanna, sem hann er sakaður um að hafa orðið að bana, hafa verið gerandi í málinu. Sonurinn hafi hins vegar verið hreinsaður af sök, vegna þess að móðir hans gaf honum fjarvistarsönnun.

Verslunareigandinn sagði Alfreð hafa verið mjög svekktan, hann hafi viljað að sonur hjónanna yrði sakfelldur fyrir nauðgunina.

Frétt af mbl.is

Talaði um Guð, djöfulinn og Jesú við handtöku

Hætti að koma þegar hann fór að skulda

Téður verslunareigandi sagði að Alfreð hefði sagt sér frá þessu, en Alfreð vandi komur sínar í verslunina um tíma. Verslunareigandinn seldi honum striga og gaf honum stundum málningu. Sagði hann Alfreð hafa hætt að koma í verslunina þegar hann fór að skulda.

Spurður um framkomu og hegðun Alfreðs þegar hann vandi komur sína í verslunina sagði hann að Alfreð hafi alltaf verið rólegur. Hann hafi virst vera við ágæta heilsu og ekki að sjá á honum að hann væri að neyta eiturlyfja. Sagði hann enn fremur að Alfreð hafi verið mjög greindur og fær um að skapa hvað sem hann vildi í höndunum.

Heilsu Alfreðs fór að hraka

Eftir að Alfreð hætti að koma í verslunina fylgdist verslunareigandinn með honum úr fjarska. Kveðst hann hafa tekið eftir því hvernig andlegri heilsu Alfreðs fór að hraka hægt og rólega.

Eins og Morgunblaðið og Austurfrétt fjölluðu um í síðustu viku hefur Alfreð lengi átt við geðrænan vanda að stríða.

Verslunareigandinn segist hafa haft spurnir af því að Alfreð hefði farið með öll málverkin sín upp í sveit og brennt þau. Sagði hann Alfreð stundum hafa sýnt sér myndir af verkum sínum, og þá talað um að hann hefði séð alls konar hluti í myndunum. Sagði hann málverk Alfreðs hafa verið með guðlegu ívafi, „dálítið af drottni og guðum,“ sagði hann.

Sagði verslunareigandinn að hann hafi ekki tekið eftir geðrænum heilsubresti hjá Alfreð fyrir árið 2021.