Daði Már Kristófersson, fjármálaráðherra og varaformaður Viðreisnar, segir að agi í fjármálum, umbætur í ríkisrekstri og taumhald á útgjöldum til þess að styðja áfram við lækkun vaxta og verðbólgu verði forgangsverkefni ríkisstjórnarinnar. 

„Ríkið þarf að fjárfesta í verkefnum af skynsemi og stofna ekki til rekstrar í góðæri sem við höfum ekki efni á í samdrætti. Við ætlum að taka upp stöðugleikareglu í fjármálum hins opinbera til þess að ná betri árangri og skjóta styrkari stoðum undir stöðugleika til framtíðar og lækkun vaxta,“ sagði Daði Már á Alþingi í kvöld í umræðum um stefnuræðu forsætisráðherra. 

Þá sagði hann að skatttekjur væri undirstaða rekstrar ríkisins.

„Hversu umfangsmikill sá rekstur á að vera er þrætuepli stjórnmálanna. Um hitt erum við sammála að skattar eigi að vera sanngjarnir og skilvirkir og skattkerfið skiljanlegt og gagnsætt.“

Umbætur, hagræðing og aukin skilvirkni

Daði Már benti á að ríkisstjórnin hefði sett það í forgang að standa fyrir umbótum, hagræða og auka skilvirkni.

„Aðhald í rekstri ríkisins þarf hins vegar að koma frá ríkinu sjálfu. Flatur niðurskurður og viðvarandi aðhaldskrafa gerir ekki greinarmun á slæmri hugmynd eða úreltri og góðri. Þessari nálgun þarf að breyta. Annars hækkar stöðugt hlutfall ríkisútgjalda sem fer til úreltra verkefna á kostnað nýrra áherslna, nýsköpunar og fjárfestinga í innviðum.“

Daði Már tók fram að náttúruöflin, stríð og vaxandi spenna í alþjóðaviðskiptum gæti gert Íslandi óskunda þegar síst varir.

„Það er skylda okkar stjórnmálamanna að tryggja að ríkissjóður sé vel í stakk búinn til að geta brugðist við áföllum. Þeirri ábyrgð megum við aldrei gleyma.   

Ríkisstjórnin ætlar sér að vinna saman, rjúfa kyrrstöðu og ná árangri,“ sagði ráðherra. 

Tengdar fréttir

Alþingi

Fátt nýtt í stefnuræðu Kristrúnar

• Myndskeið: Mótmæli kennara berast inn í þingsal
• Inga Sæland: Ekkert barn þurfi að líða skort
• Þórdís Kolbrún: Endurspegli reynsluleysi
• Sigmundur: Samfylkingin í sömu stöðu og Bláa lónið

» Fleiri tengdar fréttir

• Blogga um frétt