Kosinn bæði frá hægri og vinstri
Setja bókamerki
„Ljóst er að Ólafur Ragnar fékk mikinn stuðning bæði frá fólki sem kýs til vinstri og hægri í alþingiskosningum og það fylgi fékk hann vegna afdráttarlausrar afstöðu sinnar til málefna sem sameina mikinn meirihluta þjóðarinnar,“ segir Ragnar Arnalds, fyrrverandi fjármálaráðherra og forveri Ólafs Ragnars Grímssonar, forseta Íslands, á formannsstóli Alþýðubandalagsins en Ragnar var einn þeirra sem hvöttu Ólaf til þess að gefa kost á sér til endurkjörs í vetur.
Vísar Ragnar þar einkum til Icesave-málsins og andstöðunnar við inngöngu í Evrópusambandið.
„Ótvíræð afstaða Ólafs gegn ESB-aðild og framganga hans í Icesave-málinu varð til þess að jafnvel hörðustu andstæðingar hans frá fyrri tíð þyrptust á kjörstað til að styðja hann og margir þeirra sögðu: Ég veit hvað ég hef. En ég veit ekki hvað ég fæ!“ segir Ragnar á vefsíðunni Vinstrivaktin gegn ESB í dag.
Ragnar segir niðurstöðu forsetakosninganna varpa ljósi á stöðu mála innan Vinstrihreyfingarinnar - græns framboðs fyrir komandi þingkosningar sem fram fara í síðasta lagi næsta vor.
„Flokkurinn mun ganga haltur og hokinn til næstu þingkosninga og sligast mjög undan þeirri þungu byrði sem hann tók á sínar herðar með aðildarumsókninni – nema því aðeins að hann varpi þessu óþverrahlassi af sér með góðum fyrirvara fyrir næstu kosningar og segi við Össur og Jóhönnu: Nú er nóg komið! Þessum könnunarleiðangri er lokið! Hingað og ekki lengra!“ segir Ragnar.
Víkingar komnir yfir 800 milljónir í greiðslur
Lát hjóna í Neskaupstað: Ákæra gefin út
„Mér finnst gamla Samfylkingin komin aftur“
„Þetta er ríkisstjórn almannahagsmuna“
Funda með þingflokkum
Stormur á Þorláksmessu en víðast hvar stefnir í hvít jól
Alvarleg netárás á Wise
„Tímabil aukinnar eldvirkni“
