Innlent | Kosningar | Morgunblaðið | 27.11.2017 | 5:30

Ríkisstjórn kynnt í vikunni

Formenn VG, Sjálfstæðisflokks og Framsóknarflokks reka væntanlega smiðshöggið á nýja ríkisstjórn í dag. mbl.is/Hari

Ríkisstjórn Sjálfstæðisflokksins, Vinstrihreyfingarinnar – græns framboðs (VG) og Framsóknarflokksins verður að öllum líkindum kynnt í lok vikunnar.

Samkvæmt heimildum Morgunblaðsins er stjórnarsáttmálinn svo gott sem tilbúinn og verður hann lagður fyrir þingflokkana í dag og fyrir flokksstofnanir um miðja vikuna.

Formenn flokkanna þriggja funduðu í Ráðherrabústaðnum í gær og munu koma aftur saman fyrir hádegi í dag til að ljúka við það allra síðasta áður en haldið er á fund með stjórnarandstöðunni í Alþingishúsinu og síðan með þingflokkum sínum að því loknu.