Innlent | Kosningar | mbl | 28.8.2021 | 17:39 | Uppfært 6.9.2021 14:19

„Skrítnari en kosningaloforð Miðflokksins“

Þorgerður Katrín á landsfundinum fyrr í dag. mbl.is/Sigurður Unnar Ragnarsson

Þorgerður Katrín Gunnarsdóttir, formaður Viðreisnar, sagðist á landsþingi flokksins fyrr í dag óska eftir því að skýrsla um eignarhald 20 stærstu útgerðarfélaga landsins í íslensku atvinnulífi verði unnin upp á nýtt.

Frétt af mbl.is

Allar upplýsingar í skýrslu sem óskað var eftir

Hún sagði skýrsluna hafa verið „skrítnari en kosningarloforð Miðflokksins“ og að um skandal sé að ræða.

„Ég óska eindregið eftir því að skýrslan verði unnin upp á nýtt og þá dugar ekki fyrir ríkisstjórnina að skýla sér á bak við Persónuvernd svo hægt sé að sitja áfram á upplýsingum fram yfir kosningar,” sagði Þorgerður Katrín og bætti við að þetta sé enn ein birtingarmynd þess að skipta þurfi um ríkisstjórn.

Frétt af mbl.is

Ræða Þorgerðar á landsþingi Viðreisnar

Hún sagði flokk Viðreisnar hafa áorkað miklu á kjörtímabilinu og verið samkvæman sjálfum sér. Hann hafi ekki verið á móti bara til að vera á móti. Flokkurinn hafi aukið aðgengi að geðheilbrigðis- og sálfræðiþjónustu, lagt fram nýja skilgreiningu á nauðgun í hegningarlögum og óskað eftir skýrslu um „þá óskiljanlegu og ómannúðlegu ákvörðun ríkisstjórnarinnar um breytingar á fyrirkomulagi skimunar fyrir leghálskrabbameini”.

Einnig nefndi hún að flokkurinn hafi lagt fram frumvörp um að tímabinda samninga og markaðsverða á makríl um dreifða eignaraðild, aukið gegnsæi og skráningu sjávarútvegsfyrirtækja á hlutabréfamarkaði.

Læst ofan í skrifborðsskúffu Svandísar

Þorgerður Katrín sagði að mál forsætisráðherra um auðlindaákvæði í stjórnarskránni hafa verið sorglegt klúður og skilaboð ríkisstjórnarinnar þau að ekki skuli hrófla við útgerðinni.

Hún bætti við: „Hvar er hugsjón Sjálfstæðisflokksins um einkarekstur í heilbrigðiskerfinu? Hún er læst ofan í skrifborðsskúffu Svandísar Svavarsdóttur.

Hvar er hugsjón VG um loftslagsmálin? Hún er læst inn í skúr hjá Sjálfstæðisflokknum. Hvar er fallega hugsjón VG um manneskjulegri innflytjendamál? Hún er í gíslingu hjá þingmönnum og ráðherra Sjálfstæðisflokksins.

Hvar er síðan Framsóknarflokkurinn sem vill nú kenna sig við miðjuna þegar ægivald jaðranna í ríkisstjórn hefur ráðið öllu.. Svona flokkur er ekki hugsjónaflokkur heldur valdaflokkur,” sagði hún og gagnrýndi einnig stöðuna í heilbrigðiskerfinu og þá biðlista sem þar ríkja.

„Það er því ódýrt, á síðustu metrum fyrir kosningar, að kasta allri ábyrgð á heilbrigðisstarfsfólk, Landspítalann eða samráðherra á þeirri stöðu sem nú er upp í heilbrigðiskerfinu,” sagði hún.