Innlent | Kosningar | mbl | 27.9.2021 | 15:43 | Uppfært 17:50

Kristín vonar að hægt verði að eyða óvissunni

Kristín Edwald (fyrir miðju) á fundi landskjörstjórnar fyrr í dag. mbl.is/Eggert Jóhannesson

Landskjörstjórn hefur beðið yfirkjörstjórnir allra sex kjördæma að skila skýrslu um framkvæmd talningar í alþingiskosningunum á laugardag. Formaður stjórnarinnar, Kristín Edwald, segir að næsta skref sé að bíða þessara skýrslna, sem og framvindu endurtalningar í Suðurkjördæmi.

Segja má að algjör óvissa sé uppi um endanlegar niðurstöður kosninganna, sérstaklega vegna endurtalningar í Norðvesturkjördæmi í gær sem hafði þær afleiðingar að jöfnunarþingsæti á landsvísu skoluðust til.

Frétt af mbl.is

Fundur landskjörstjórnar hafinn

Skýrslunum, sem landskjörstjórn hefur farið fram á að verði gerðar, á að skila fyrir klukkan átta í kvöld. Í þeim á að koma fram skýring á framkvæmd talningar kjördæmanna, meðferð kosningagagna, útlistun á boðunum og samskiptum við umboðsmenn flokka og afrit af fundargerðum.

„Núna erum við að bíða eftir endurtalningu í Suðurkjördæmi og við erum að bíða eftir þessum skýrslum,“ segir Kristín Edwald við mbl.is að loknum fundi landskjörstjórnar.

Frétt af mbl.is

Talið aftur í Suðurkjördæmi í kvöld

Að því loknu segist Kristín vona að landskjörstjórn geti sinn skyldu sinni, sem er að úthluta þingsætum til þeirra er voru kosnir til að sitja á Alþingi. Til þess að svo megi verða þarf endanleg niðurstaða kosninganna að liggja fyrir, en hún liggur alls ekki endanlega fyrir.

Talning atkvæða. mbl.is/Árni Sæberg

Óvissa

Í samtölum blaðamanns við hina ýmsu málsmetandi menn í dag, hefur spurningum um stöðu mála fylgt mikið humm og ha? Það dylst engum að óvissa ríkir um framvindu mála og fáir ef nokkur virðist vita hvert framhaldið verður. Í skugga alls þessa sitja nú formenn stjórnarflokkanna og ræða sín á milli um mögulegt áframhaldandi stjórnarsamstarf.

Frétt af mbl.is

Katrín, Bjarni og Sigurður Ingi funda

Eins og fyrr segir vonar Kristín að í skýrslu yfirkjörstjórnar Norðvesturkjördæmis sannist að ekki hafi með neinu móti verið hægt að eiga við kjörgögnin, hvort sem er á meðan eða skömmu eftir að talningu lauk aðfaranótt sunnudagsins síðasta.

Ímyndum okkur að svo verði ekki, að í skýrslunni segi bara að kjörgögnin hafi verið í ólæstu herbergi eða eitthvað og hver sem er hefði getað komist í þau, hvað gerist þá?

„Það er náttúrulega búið að kæra þetta til bæði lögreglu og svo kæra sem fer fyrir Alþingi. Ef kosningin í Norðvesturkjördæmi er svo úrskurðuð ógild verður svokölluð uppkosning og kjósa þarf aftur,“ segir Kristín.