Endurnýjað ríkisstjórnarsamstarf liggur nú fyrir, stjórnarsáttmáli er tilbúinn og ekkert er því til fyrirstöðu að nýtt ráðuneyti Katrínar Jakobsdóttur verði myndað á morgun, sunnudag, að því tilskildu að viðeigandi flokksstofnanir stjórnarflokkanna fallist á tillögur formanna stjórnarflokkanna.

Frétt af mbl.is

Nýr stjórnarsáttmáli og ríkisstjórn á sunnudaginn

Samkvæmt heimildum Morgunblaðsins verður nokkurt nýjabrum á umgjörð ríkisstjórnarinnar, bæði hvað varðar verkefni og verkaskiptingu. Ýmsir málaflokkar verða fluttir milli ráðuneyta og ný ráðuneyti kynnt til sögunnar. Þá munu stjórnarflokkarnir skipta á ýmsum veigamiklum ráðuneytum og eins verða talsverðar tilfæringum á ráðherrum.

Ráðherrar hinnar endurnýjuðu ríkisstjórnar verða tólf talsins í stað ellefu áður, en hinn nýi ráðherra mun koma úr röðum Framsóknar til þess að endurspegla fylgisaukningu flokksins í þingkosningunum í september.

Ört fundað um helgina

Flokksstofnanir ríkisstjórnarflokkanna þriggja hafa verið boðaðar til fundar í dag, laugardag, en ekki er gert ráð fyrir að þar reynist mikil ef nokkur fyrirstaða gegn endurnýjuðu ríkisstjórnarsamstarfi. Leggi þær blessun sína yfir stjórnarsamstarfið verður boðað til þingflokksfunda stjórnarflokkanna í fyrramálið þar sem formenn flokkanna munu hver fyrir sig leggja fram tillögu að skipan ráðherraembætta á vegum flokkanna. Þingmenn í stjórnarliðinu segja afar ósennilegt að þingflokkarnir geri breytingar á þeim tillögum.

Til stendur að óbreyttu að hin nýja ríkisstjórn verði kynnt á blaðamannafundi á sunnudag kl. 13, þar sem grein verður gerð fyrir nýjum stjórnarsáttmála, breyttri skipan ráðuneyta og hverjir muni gegna ráðherraembættum í stjórninni.

Að því loknu verður haldið til Bessastaða, þar sem hið nýja ráðuneyti mun formlega taka til starfa á ríkisráðsfundi.

Gert er ráð fyrir því að hefðbundin lyklaskipti ráðherra fari fram þegar á mánudagsmorgun.

Tengdar fréttir

Alþingiskosningar 2021

Hafa „ágætis tíma“ til úrbóta

• Spyr hvort að ekki þurfi að boða til kosninga
• Niðurstaða MDE kallar á breytingar
• Niðurstaða MDE hefur engin bein réttaráhrif
• Stjórnvöld þurfi að axla ábyrgð

» Fleiri tengdar fréttir