Eflum stöðu kvenna í forystu

Félag kvenna í atvinnulífinu hefur verið leiðandi hreyfiafl í rúman aldarfjórðung en tilgangur félagsins er að styrkja enn stöðu kvenna í íslensku atvinnulífi og fjölga konum í stjórnunarstöðum og í eigin rekstri. Starfsemi FKA felur í sér fjölbreytta viðburði á borð við morgunfundi, fræðslu og námskeið og innan FKA eru til að mynda þrjár öflugar deildir; LeiðtogaAuður, FKA Framtíð og AtvinnurekendaAuður. 

„Að skrá mig í FKA Framtíð er ein besta fjárfesting sem ég hef gert. Dýnamíkin og kvenmátturinn í FKA Framtíð finnst ekki á hverju strái og það sem mér þykir best er að allar félagskonur eru með svipað markmið en það finnst engin samkeppni. Bara stuðningur, samvinna og vinsemd,“ segir Amy Dyer formaður FKA Framtíð en hún gekk í FKA árið 2022 af því að hún var nýbúin að stofna fyrirtæki.

„Ég gerðist auðvitað strax félagskona í FKA Framtíð enda undir þrítugu og fékk 50% afslátt af félagsgjöldum. Eftir tvö ár sem félagskona bauð ég mig fram til stjórnar FKA Framtíðar og hlaut formennsku. Þetta sýnir að konum eru gefin tækifæri innan FKA og að manni raunverulega eru allir vegir færir.“

Allir vegir færir

Aðspurð hver sé tilgangur FKA Framtíðar segir Amy að deildin eigi að vera stökkpallur fyrir þær sem vilja skapa sér ný tækifæri og ná lengra í framþróun. „FKA Framtíð er deild innan FKA sem sameinar framsæknar konur og leggur áherslu á styrkingu tengslanets og hagnýta fræðslu sem nýtist í einkalífi sem og í starfi. Þemað hjá okkur í ár er „Þér eru allir vegir færir“ og því trúum við heilshugar að sé rétt. Þú getur allt sem þú ætlar þér, FKA Framtíð mun aðstoða þig að ná þínum markmiðum með stuðningi og þekkingarmiðlun,“ segir Amy og bætir við að eitt það dýrmætasta við að hafa gengið í FKA Framtíð séu vinkonurnar.

„Dýrmætast þykir mér að hafa eignast góðar vinkonur en þær öflugu konur sem skipa stjórn FKA Framtíðar með mér komu hreinlega eins og kallaðar inn í líf mitt. Að eiga góða að er svo ómetanlegt og þessar konur eru mínar klappstýrur sem og ég þeirra.“

Stjórn LeiðtogaAuðs: Svanhildur Jónsdóttir, Elfa Björg Aradóttir, Erla Ósk Ásgeirsdóttir, Elín Gränz, Ásdís Arna Gottskálksdóttir. Á myndina vantar Ásu Karín Hólm. Ljósmynd/Aðsend

Eflum stöðu kvenna í forystu

„Rætur LeiðtogaAuðar liggja 25 ár aftur í tímann þegar hópur kvenna fór í stjórnendaþjálfun á Mývatni í tengslum við verkefnið „AUÐUR í krafti kvenna“ sem stóð yfir á árunum 2000-2003. Þær konur tóku með sér þaðan dýrmætan lærdóm sem þær nýttu til að hreyfa við hlutunum í atvinnulífinu. Frá þeim tíma hefur hópurinn stækkað og nýjar konur bæst við, með það að markmiði að efla stöðu kvenna í forystuhlutverkum,“ segir Svanhildur Jónsdóttir formaður LeiðtogaAuðar en það er deild innan FKA sem er sérstaklega ætluð konum með yfirgripsmikla stjórnunarreynslu í einkageiranum og opinbera geiranum.

Félagskonur í LeiðtogaAuði tilheyra forystusveit íslensks atvinnulífs, þar sem þær gegna eða hafa gegnt ábyrgðarstöðum og vilja vera öðrum konum hvatning, fyrirmynd og stuðningur í eflingu íslensks atvinnulífs.

Tengslanet og orðspor

Aðspurð hvernig það hafi styrkt hana að vera í FKA segir Svanhildur að félagið hafi gefið henni tækifæri á að efla tengslanetið og kynnast fjölbreyttum konum. Að finna fyrir hvatningu og jákvæðni frá öðrum konum.

„Svo fæ ég líka tækifæri til að heyra af áskorunum og sigrum í fjölbreyttum atvinnugeirum, bæði til að læra af reynslu annarra og að fá innblástur. Það er ánægjulegt að sjá hvað konur eru komnar í margar áhrifastöður í samfélaginu og vona ég að það smitist enn frekar út í atvinnulífið og að hlutfall kvenna í til dæmis framkvæmdastjórnum hækki en það er rétt rúmlega 20% í dag. Yfirskrift þessa starfsárs hjá LeiðtogaAuðum er einmitt: Leiðin að stjórnarstólnum – þekking á óskrifuðum leikreglum skiptir máli. Verkefni ársins snýr að því að varpa ljósi á þær óformlegu reglur sem hafa áhrif á það hverjir komast inn í stjórnir fyrirtækja, þar á meðal tengslanet, orðspor og stuðningur lykilaðila. Þetta eru reglur sem oft eru ósýnilegar en skipta sköpum þegar kemur að því að fá sæti við borðið þar sem stefnumótandi ákvarðanir eru teknar.“

Vera virk og tengjast öðrum konum

Svanhildur hvetur konur til að ganga í FKA og segir að þær hafi engu að tapa en allt að vinna með því að prufa FKA. „Það er mjög fjölbreyttur hópur kvenna í FKA og hver og ein getur pottþétt tengt við einhverja. Það er gott að hugsa um það að það eru margar í sömu sporum, nýbyrjaðar í FKA, mögulega einar eða komnar til að tengjast fleirum,“ segir Svanhildur en tekur fram að það sé hins vegar undir hverri og einni komið að mæta, vera virk og tengjast. Þar liggi galdurinn. „

Ég mæli með Mentor-prógramminu í FKA framtíð en sjálf tók ég þátt í því fyrir nokkrum árum. Enn þann dag í dag leita ég stundum til míns mentors. Og svo er ég núna sjálf mentor í verkefninu og fæ mikið út úr því.“

Stjórn AtvinnurekendaAuðs, efst frá vinstri: Margrét Reynisdóttir, Anna M. Björnsdóttir, Jónína Bjartmarz, Katrín Rós Gýmisdóttir og Aðalheiður Karlsdóttir. Neðri röð frá vinstri: Ragnheiður Ásmundsdóttir, Kristín Ýr Pálmarsdóttir og Ásta Sveinsdóttir. Á myndina vantar Kristínu Björgu Jónsdóttur. Ljósmynd/Silla Páls

Stuðningur við atvinnurekendur

„AtvinnurekendaAuður er félag innan FKA-regnhlífarinnar sem er sérstaklega ætlað konum sem eiga og reka fyrirtæki,“ segir Jónína Bjartmarz formaður deildarinnar og leggur áherslu á að félagið skapi vettvang þar sem konur í atvinnurekstri geta vaxið, eflt tengslanet sitt og fengið stuðning við að takast á við áskoranir sem mæta þeim sem fyrirtækjaeigendum.

„Markmið AtvinnurekendaAuðs er að standa vörð um hagsmuni félagskvenna, veita sérhæfðan stuðning og bjóða upp á fræðslufundi sem miða að þörfum og áhugasviði þeirra.“

Mikil fjölgun félagskvenna

Jónína tekur fram að skilyrði aðildar að AtvinnurekendaAuði sé að eiga og reka fyrirtæki, hvort heldur sem er einar eða með öðrum, hafa verið með rekstur eða hyggja á sjálfstæðan rekstur.

„Það hefur verið einstaklega gefandi að vera í AtvinnurekendaAuði öll þessi ár og það sem hefur verið einna mest gefandi er hve félagskonum hefur fjölgað. Þegar félagið var stofnað árið 2013 voru 34 konur sem sóttu stofnfundinn og í dag erum við að nálgast 500 félagskonur. Margar þessara kvenna eru líka mjög virkar í starfi AtvinnurekendaAuðs, tilbúnar að taka þátt í viðburðum, fyrirtækjakynningum sem og alls kyns ferðum, bæði innanlands og utan,“ segir Jónína og bætir við að virk þátttaka kvenna í fjölbreyttu starfi FKA og deilda þeirra sé til þess fallin að efla og víkka tengslanet þeirra, þekkingu og reynslu.

• Blogga um frétt