„Skemmtilegt að vera í viðskiptum þegar maður er sjálfs síns herra“

Félag kvenna í atvinnulífinu hélt glæsilega viðurkenningarhátíð á Hótel Reykjavík Grand í gær þar sem þrjár konur voru heiðraðar. Fjölmennt var á hátíðinni og mikil samstaða í hópnum.

Að þessu sinni var það Geirlaug Þorvaldsdóttir, eigandi Hótel Holts, sem hlaut Þakkarviðurkenningu FKA árið 2025. Verðlaunin eru veitt fyrir eftirtektarvert ævistarf sem stjórnandi í atvinnulífinu.

Hrefna Sigfinnsdóttir framkvæmdastjóri Creditinfo hlaut FKA viðurkenninguna sem veitt er fyrir vel unnin störf í þágu atvinnureksturs kvenna eða þeim sem er eða hefur verið konum í atvinnulífinu sérstök fyrirmynd.

Arnhildur Pálmadóttir arkitekt, sem stýrir arkitekta- og nýsköpunarfyrirtækinu Lendager, hlaut Hvatningarverðlaun FKA í gær, en verðlaunin eru veitt félagskonu í atvinnulífinu fyrir athyglisvert frumkvæði eða nýjungar.

Þess má geta að tilgangur Félags kvenna í atvinnulífinu er að styrkja stöðu kvenna í íslensku atvinnulífi og fjölga konum í stjórnunarstöðum og í eigin rekstri. Markmið félagsins er að styðja við vöxt og frama kvenna, auka nýsköpun meðal þeirra og annan atvinnurekstur, ásamt því að efla samstöðu og samstarf þeirra á milli.

Konur eiga að stunda viðskipti

Geirlaug Þorvaldsdóttir hefur verið tengd Hótel Holti í ríflega hálfa öld frá því foreldrar hennar, Þorvaldur Guðmundsson og Ingibjörg Guðmundsdóttir, byggðu hótelið og starfræktu frá 12. febrúar árið 1965. Hún lauk stúdentsprófi frá Menntaskólanum í Reykjavík og prófi í latínu frá Háskóla Íslands. Þá lauk Geirlaug einnig prófi frá Leiklistarskóla Þjóðleikhússins og starfaði sem leikkona og menntaskólakennari um árabil.

„Það er gjörólíkt að vera leikkona eða stunda viðskipti. Ég hætti að vinna sem leikkona fyrir mörgum árum þar sem ég eignaðist tvö börn með stuttu millibili. Það var ekkert annað að gera á þeim tíma. Ég sé ekki eftir því. Að vera í viðskiptum er hins vegar mjög skemmtilegt þegar maður er sjálfs sín herra,“ segir Geirlaug sem hlaut Þakkarviðurkenningu FKA 2025.

Geirlaug Þorvaldsdóttir, eigandi Hótel Holts hlaut Þakkarviðurkenningu FKA. mbl.is/Ásdís

Hún segir ástríðuna geta leitt fólk áfram til að finna viðfangsefnin í lífinu. „Þegar tækifærin koma til okkar þá ættum við ekki að hika við að láta á það reyna. Að sjálfsögðu eiga konur að stunda viðskipti,“ segir hún.

Hótel Holt á sérstakan stað í hjörtum margra landsmanna, ekki síst hluti þess sem minnir á listasafn. „Á Hótel Holti eru mikil verðmæti og ekki í boði að breyta neinu því foreldrar mínir gerðu þetta svo vel á sínum tíma. Ég hef farið fram á að allir inniviðir hótelsins séu friðaðir enda þurfum við að bera virðingu fyrir sögu og menningu staðarins,“ segir hún.

Hvaða áhrif hafa konur á atvinnulífið að þínu mati?

„Við konur höfum áhrif hvert sem við komum og ættum því að fara þangað sem hugur okkar stefnir. Mér finnst okkur engin takmörk sett og konur ættu að læra allt mögulegt enda eru þær síst eftirbátar karlmanna. Konan hefur val í dag sem hún nýtir sér og finnst mér mjög öflugar konur í öllum greinum þjóðfélagsins. Ég þakka konum í FKA viðurkenninguna,“ segir Geirlaug Þorvaldsdóttir, eigandi Hótel Holts. 

Hvatning til að gera enn betur

„FKA hefur unnið einstaklega mikilvægt starf en það er tvennt sem mér hefur fundist standa sérstaklega upp úr sem hefur skilað beinhörðum árangri í jafnréttisbaráttunni. Það er annars vegar Jafnvægisvogin sem er í senn hvatningarverkefni en ekki síður verkefni sem dregur raunverulega stöðu kynjanna upp. Við verðum að vita hver raunveruleg kynjahlutföll stjórnenda eru á hverjum tíma því hlutirnir eru svo fljótir að leita í fyrra horf. Staðan í dag kemur á óvart því við eigum það til að gefa okkur að hlutirnir séu öðruvísi en þeir eru. Hins vegar er það „mentorprógramm“ félagsins vegna þess að það að læra af reynslu og styrk annarra er svo skilvirkt,“ segir Hrefna Sigfinnsdóttir framkvæmdastjóri Creditinfo sem hlaut FKA viðurkenninguna 2025.

Hrefna Sigfinnsdóttir framkvæmdastjóri Creditinfo hlaut FKA viðurkenninguna. Ljósmynd/Aðsend

„Ég lít því fyrst og fremst á þessa viðurkenningu sem hvatningu til að gera enn betur en viðurkenni jafnframt að þykja einstaklega vænt um að tekið er eftir störfum manns. Mér finnst formæður okkar hafa náð svo miklum árangri að ekki sé annað hægt en að taka við því kefli og þegar maður kemst í sérstaklega góða stöðu til að beita sér í jafnréttismálum þá skiptir máli að hún sé nýtt,“ segir Hrefna.

Hvað viltu segja við konur um framlag þeirra til atvinnulífsins?

„Ég vil minna þær á að Ísland er eitt af ríkustu löndum í heimi. Þátttaka kvenna á íslenskum vinnumarkaði hefur þar verið einn af burðarstólpunum. Við megum aldrei skorast undan ábyrgð og við verðum að muna að samstaða og góð gildi færa okkur árangur til langs tíma,“ segir Hrefna.

Þegar kemur að 50 ára afmæli kvennafrídagsins á þessu ári segir Hrefna þakklæti vera henni ofarlega í huga. „Ég held að afmælisárinu sé best fagnað með þakklæti til þeirra kvenna sem ruddu veginn og ætla ég að hugsa til allra þeirra góðu fyrirmynda sem ég á. Jafnrétti er barátta sem má aldrei taka sem gefinni. Við verðum að hafa það hugfast að formæður okkar færðu fórnir til að við kæmumst á þann stað sem við erum á í dag. Það eru margar ógnvekjandi vísbendingar um önnur gildi en jafnrétti í heiminum í dag svo hlutverk Íslands sem fyrirmyndar í að halda baráttunni áfram hefur sjaldan verið mikilvægara. Ég ætla því að halda áfram að vera talsmaður og baráttumaður jafnréttis,“ segir Hrefna Sigfinnsdóttir framkvæmdastjóri Creditinfo.

Heiður að fá viðurkenningu frá FKA

„Það er mikill heiður að fá þessa viðurkenningu og sérstaklega frá þessum samtökum sem ryðja brautina á margan hátt fyrir konur í atvinnulífinu. Ég hef fylgst með þeim sem hafa fengið verðlaunin síðustu ár og það er ekki slæmt að fylgja í þeirra fótspor,“ segir Arnhildur Pálmadóttir, arkitekt og framkvæmdastjóri Lendager á Íslandi, sem hlaut Hvatningarverðlaun FKA 2025.

Arnhildur Pálmadóttir, arkitekt og framkvæmdastjóri Lendager á Íslandi, hlaut Hvatningarverðlaun FKA. Ljósmynd/Aðsend

„Ég er um þessar mundir að vinna að arkitektaverkefnum hjá Lendager. Í þeim verkefnum erum við að hanna byggingar þar sem við reiknum kolefnissporið samhliða hönnun til að minnka losun frá framkvæmdinni og hluti af því er að endurnota efni í ákveðna byggingarhluta. Við erum að ljúka verkefni fyrir Félagsbústaði þar sem árangurinn er 53% minna kolefnisspor en við núverandi viðmiðunarhús og 17% af byggingarefnum í húsinu eru endurnýtt efni sem hafa þá ekki losað kolefni,“ segir Arnhildur sem er einnig í áhugaverðri vinnu með börnum sínum.

„Hin arkitektastofan mín er s.ap. arkitektar. Þar er ég svo heppin að vinna með börnum mínum sem ákváðu að læra hönnun, sonur minn Arnar Skarphéðinsson var að ljúka meistaranámi í arkitektúr í Los Angeles og dóttir mín er með meistaragráðu í fatahönnun frá New York en vinnur núna þvert á hönnunarfagið. Við erum saman, ásamt þverfaglegu teymi, að undirbúa sýningu á Feneyjatvíæringnum í arkitektúr þar sem Ísland tekur þátt í fyrsta sinn með eigin skála. Verkefnið heitir Lavaforming og snýst um að nota hraun sem byggingarefni fyrir byggingar og jafnvel heilar borgir, ekki ólíkt því sem náttúran hefur sjálf gert í gegnum aldirnar. Hraun hefur fjölbreytta efniseiginleika og sem byggingarefni hefði það mun lægra kolefnisspor en hefðbundin byggingarefni þar sem losun kolefnis við myndun efnisins gerist hvort sem er náttúrulega og er mun minni en það sem við manneskjan losum árlega í okkar framleiðslu á efnum,“ segir Arnhildur sem vonar að í náinni framtíð verði hugarfarsbreyting hjá okkur mannfólkinu.

„Ég er að vona að við förum að hugsa meira um það hvernig okkur og öðrum líður og hvernig hönnun og arkitektúr hefur áhrif á það. Það hefur augljóslega jákvæð áhrif að hanna umhverfi okkar og byggingar út frá þörfum manneskjunnar. Við erum því miður ekki að leggja nógu mikla áherslu á það í dag. Við þurfum að byggja hús með gluggum sem ná birtu inn, þar sem við sjáum og rekumst á nágranna okkar annað slagið og þar sem okkur getur liðið vel í fjölbreyttum og áhugaverðum rýmum. Geðheilsa verður sennilega eitt af stærstu vandamálum mannkynsins á næstu árum og hvernig við búum og lifum skiptir þar mjög miklu máli. Traust þak yfir höfuðið á líka að vera mannréttindi fyrir alla en ekki aðallega fjárfestingartækifæri eins og það er núna víðs vegar um heiminn,“ segir Arnhildur.

Hvernig ætlarðu að halda upp á kvennaárið 2025?

„Kvennaárið fellur saman við að það eru 50 ár frá ári evrópska byggingararfsins 1975. Yfirskrift þessa verkefnis er: „Windows to the Past, Doors to the future“. Ég held að við getum leyst mörg okkar verkefna og áskorana í dag með því að að líta til baka og læra af því hvernig við lifðum og gerðum hlutina hér áður í meiri tengslum við náttúruna. Við þurfum að horfa til framtíðar og ímynda okkur nýjan heim þar sem áskoranir eins og loftslagsbreytingar munu breyta því hvernig við lifum.

Við sjáum þetta um allan heim með stormum, skógareldum, flóðum og hitabylgjum sem slá met á hverju ári og sem munu líklega hafa áhrif á það hvernig við byggjum byggingar í framtíðinni. Byggingar framtíðarinnar munu líta öðruvísi út en þær sem við búum í í dag. Við erum að nota og framleiða of mikið af fötum og dóti sem losa of mikið af kolefni. Það er því tækifæri til að líta til baka og taka með okkur þekkinguna úr fortíðinni til að opna dyrnar að framtíðinni og við getum til dæmis gert það í gegnum nýsköpun og hönnun,“ segir Arnhildur Pálmadóttir arkitekt.

• Blogga um frétt