Vísbendingar um að spænska veikin hafi átt uppruna í fuglum

Spænska veikin, sem lagði 50 milljónir manna að velli á árunum 1918-19, stafaði væntanlega af afbrigði inflúensuveiru sem átti uppruna sinn í fuglum. Vísindamenn hafa komist að raun um að þessi veira hefur tekið svipuðum stökkbreytingum og H5N1 fuglaflensuveiran sem nú gengur í Asíu og hefur valdið dauða a.m.k. 65 manna.

Á fréttavef BBC segir, að vísindamenn, sem rannsakað hafa veiruna, hafi skrifað grein í tímaritið Nature. Þar komi fram að þessi niðurstaða undirstriki þá hættu, sem stafi af núverandi fuglaflensuveiru.

Í annarri ritgerð, sem birtist í tímaritinu Sciece, er upplýst að bandarískir vísindamenn hafa ræktað veiruna frá 1918 í músum. Veiran er geymd hjá bandarísku sóttvarnastofnuninni og eru miklar öryggisráðstafanir viðhafðar. Vonast er til að hægt sé að gera tilraunir á veirunni til að auka skilning á því hvers vegna hún var jafn smitandi og raun bar vitni.

Tekin voru sýni úr líkamsleifum fólks, sem lést af völdu spænsku veikinnar og þannig var hægt að endurskapa veiruna.

• Blogga um frétt