Eldflaug SpaceX kom Jason-3-gervitunglinu á braut um jörðu nú fyrir stundu en svo virðist sem að tilraunalending 1. þreps eldflaugarinnar á pramma á hafi úti hafi mistekist. Á Twitter-síðu SpaceX kemur fram að þrepið hafi lent á prammanum en lendingin hafi verið hörð og einn lendingarfótanna hafi brotnað.

Falcon 9-eldflauginni var skotið á loft frá Kaliforníu um kl. 18:45 að íslenskum tíma. Staðfest er að farminum, Jason-3-hafrannsóknagervitunglinu, hafi verið komið á braut um jörðu. Ætlun SpaceX var einnig að lenda 1. þrepi eldflaugarinnar líkt og því tókst að gera í fyrsta skipti í síðasta mánuði.

Lendingartilraunin var gerð á pramma úti í Kyrrahafinu að þessu sinni þar sem tilskilin leyfi fyrir lendingu á landi fengust ekki í tæka tíð. Nokkuð slæmt var í sjóinn en ekki fylgir sögunni hvort að það hafi haft áhrif á tilraunina. SpaceX sendi beint út frá tilrauninni en gervihnattasamband við prammanna glataðist skömmu áður en eldflaugarþrepið átti að lenda.

Í færslu á Twitter segir SpaceX að eldflaugarþrepið hafi hitt á prammann en lendingin hafi verið of hörð þannig að einn lendingarfótanna brotnuðu. Ekki hefur verið gefið út hvort að það hafi orðið til þess að eldflaugin hafi sprungið eins og gerðist síðast þegar reynt var að lenda á pramma eða hvort hægt sé að endurnýta hana. 

First stage on target at droneship but looks like hard landing; broke landing leg. Primary mission remains nominal → https://t.co/tdni53IviI

— SpaceX (@SpaceX) January 17, 2016

Uppfært kl. 20:47 Elon Musk, eigandi SpaceX, skrifar á Twitter að það sé mun erfiðara að lenda á pramma en á landi enda skotmarkið mun minna. Það hafi hins vegar ekki verið það sem kom í veg fyrir að lendingin heppnaðist. Hraði eldflaugarinnar hafi verið ágætur en einn lendingarfóturinn hafi ekki skorðast fastur og því hafi eldflaugarþrepið oltið.

However, that was not what prevented it being good. Touchdown speed was ok, but a leg lockout didn't latch, so it tipped over after landing.

— Elon Musk (@elonmusk) January 17, 2016

Tengdar fréttir

SpaceX

Mars-geimskutla Musks sprakk í loft upp

• Eldflaugaskotið gekk eins og í sögu
• Vel heppnað skot hjá SpaceX
• Trump skipar Musk í ráðgjafaráð
• Musk vill milljón manna borg á Mars

» Fleiri tengdar fréttir

• Blogga um frétt