Toyota fjárfestir í Uber

Japanski bílaframleiðandinn Toyota ætlar að fjárfesta 500 milljónum Bandaríkjadala, rúmum 53 milljörðum íslenskra króna, í bandaríska fyrirtækinu Uber. Fjárfestingin mun beinast að fjöldaframleiðslu sjálfakandi bíla, sem fyrirtækin hyggjast þróa í sameiningu.

Í umfjöllun BBC um málið segir að áætlanir geri ráð fyrir að bílstjóralausu ökutækin verði notuð í þjónustu Uber, sem víða hefur náð fótfestu á leigubílamarkaði, þrátt fyrir að félagið tapi peningum án afláts. Fjárfesting Toyota er talin til marks um að fyrirtækin tvö ætli að ná í skottið á keppinautum sínum, í þróun sjálfkeyrandi bíla.

Í fréttatilkynningu sem BBC vitnar til segir að hugbúnaður frá báðum fyrirtækjum verði nýttur í ökutæki sem framleidd verði af Toyota og að bílaflotinn verði byggður á smárútum Toyota af Sienna-gerð. Gert er ráð fyrir því að afurð samstarfsins verði komin í prófun árið 2021.

Tæknideildir Toyota og Uber munu sameina krafta sína, til að ná í skottið á keppinautum. Skýringarmynd/Uber

Uber hefur átt í vandræðum með þróun sjálfkeyrandi bíla. Tækniblaðamaður BBC í Norður-Ameríku, Dave Lee, segir að augljóst hafi verið að fyrirtækið þyrfti á utanaðkomandi hjálp að halda, en að samstarfið geti líka orðið Toyota til hagsbóta og sé jafnvel frábært tækifæri fyrir japanska bílaframleiðandann.

Frétt af mbl.is

Sjálfkeyrandi bíll drepur vegfaranda

„Frá því var greint fyrr í þessum mánuði að Uber væri að verja 1-2 milljónum Bandaríkjadala á degi hverjum í þróun sjálfkeyrandi tækni,“ skrifar Lee og lætur svo að því liggja að útkoman hafi ekki verið frábær, því hingað til hafi starfsemin haft í för með sér eitt banaslys, mjög dýra lögsókn og lítinn sjálf-akstur.

Umfjöllun BBC í heild sinni

• Blogga um frétt