Flugvélaframleiðandinn Boeing ætlar að senda gínu sem lítur út eins og Rosie the Riveter, menningarlegt tákn úr síðari heimsstyrjöld sem veitti fjölda kvenna innblástur, út í geim í hylki án áhafnar í dag.
Ferðinni er heitið til Alþjóðlegu geimstöðvarinnar og aftur til jarðar en áætlað er að ferðin muni taka átta daga. Hún er undirbúningsæfing fyrir áætlanir NASA um að binda endi á það að Bandaríkin séu háð Rússlandi hvað varðar geimferðir.
Þjóðarstolt Bandaríkjanna er því í húfi en einnig orðspor Boeing. Framleiðandinn er nú staddur í miðri öryggiskreppu vegna 737 MAX-þotu sinnar.
Rosie verður eini farþegi hylkisins en hún er helst þekkt fyrir að vera stjarna herferðar sem miðaði að því að fá konur til starfa í skotfæraverksmiðjum í seinni heimsstyrjöldinni. Var hún þá klædd í bláan fatnað, með rauðdoppóttan höfuðklút og áberandi upphandleggsvöðva.
Síðan 2011 hefur NASA, geimferðastofnun Bandaríkjanna, neyðst til að reiða sig á rússneskar Soyuz-geimflaugar fyrir sín ferðalög út í geiminn. Nú vilja Bandaríkin slíta geimtengslin við Rússa.