Gervigreindur kennari tekur til starfa í HR

Nýr gervigreindur aðstoðarkennari frá Atlas Primer verður tekinn í notkun í völdum áföngum í Háskólanum í Reykjavík í haust, en hann mun meðal annars aðstoða kennara við að flytja fyrirlestra, svara spurningum nemenda og æfa þá í kennsluefninu.

Þetta kemur fram í tilkynningu frá íslenska sprotafyrirtækinu Atlas Primer sem sérhæfir sig í menntatækni sem ætlað er að stuðla að jákvæðum samfélagslegum úrbótum.

Hinrik Jósafat Atlason, stofnandi Atlas Primer og stundakennari við HR. Ljósmynd/Aðsend

Í tilkynningunni segir að talþjóninum sé ætlað að auka sveigjanleika námsins með því að ræða við nemendur á töluðu máli hvert sem þeir fara, en hann byggir á máltækni sem gerir honum kleift að eiga samræður á töluðu máli og er hann aðgengilegur í nánast öllum snjalltækjum og getur því fylgt nemendum hvert sem þeir fara.

Talþjónninn getur rætt við nemendur um kennsluefnið, svarað spurningum um það og prófað þá í efninu, auk þess sem hann getur flutt fyrirlestra og veitt aðgang að öðru kennsluefni eins og rafrænum kennslubókum.

„Þessari lausn er ekki ætlað að koma í staðinn fyrir kennara heldur á hún að hjálpa þeim að nýta tíma sinn betur og verja meiri tíma í að sinna þörfum hvers og eins nemanda,“ segir Hinrik Jósafat Atlason, stofnandi Atlas Primer og stundakennari við HR.

Aðstoðarkennarinn getur fylgt nemendum hvert sem er. Ljósmynd/Aðsend

• 1 blogg um fréttina

Bloggað um fréttina

• Hallmundur Kristinsson: Ekki ekta