Kuldinn á norðurhveli festur á gervitunglamynd

Svona leit Ísland og næsta nágrenni á norðurhveli út þegar eitt gervitungla NASA, bandarísku geimvísindastofnunarinnar, sveif yfir landinu fyrr í vikunni.

Hafísinn er ekki svo fjarri Vestfjörðum og norðan- og austanvert landið þakið snjó á meðan suðvesturlandið er snjólétt. Skýjamynstur er einkennandi, þar sem kalt og þurrt loft kemur af ísnum og yfir hlýrri sjó.

Lægð austan við landið sést vel á myndinni og sandfok af suðurströndinni.

Vegna frostkulda undanfarið hefur íshröngl víða myndast í innfjörðum og teppt smábátahafnir.