40-50 laxar á dag í Blöndu

Blanda er komin í gang og gott betur en það en stangirnar sem voru við veiðar í morgun voru komnar með dagskvótann, sem er 12 laxar á stöng, fyrir hádegi.

„Það telur hratt þegar það eru að koma upp 40-50 laxar á dag" segir Stefán Sigurðsson hjá Lax-Á en Blanda nálgast óðum 300 laxa en verður með þessu áframhaldi komin í 500 laxa fyrir lok vikunnar, jafnvel meira.  Mikill lax er að ganga og mest af því er fallegur tveggja ára lax.  Mest veiðist að venju á svæði I en menn sem hafa aðeins kíkt á svæði II hafa orðið varir við laxa sem eru á hraðri göngu upp ána.  

Af öðrum ám hjá Lax-Á eru líka góðar fréttir en Ytri Rangá er að komast í 100 laxa og Skjálfandafljót er komið í 70 laxa.  Í báðum ánum er lax að ganga og það er sama staðan þar sem víða ídag, mikið af laxinum er vænn tveggja ára lax sem svo sárlega vantaði í fyrra.  Það eina sem gæti spillt gleðinni á norðurlandi þessa vikuna er veðrið en það er spáð norðanátt og kólnandi veðri sem kallar bara á hlýrri fatnað og meira heitt kaffi í bílnum því það þarf meira en smá kulda til að hægja á veiðimönnum þessa dagana þegar árnar eru að komast á fullt skrið.

• Blogga um frétt

Seinustu hundraðkallar sumarsins