Hörkuveiði en ekki þjóðgarðsbleikja

Ívar Bragason, tryggingasali hjá TM, gerði hörkuveiði á kajak út frá Heiðabæ 2, við Þingvallavatn. Ívar sem er þaulreyndur silungsveiðimaður segir mikið af góðri bleikju í vatninu og ljóst sé að ástandið á henni sé gott. Bleikjurnar voru á bilinu 50 til 60 sentímetra langar og spikfeitar.

„Ég fór nokkuð langt frá landi eða svona 150 metra. Ég var að veiða með tökuvara og taumurinn var um það bil tvær stangalengdir eða 18 til 20 fet.“

Ívar Bragason er einn af þeim sem stunda Þingvallavatn af krafti. Ljósmynd/Aðsend

Flugurnar voru hnýttar af honum sjálfum. Svart vinyl rip og kúla. Krókur númer 14. „Þetta voru ekki merkilegar flugur og hún hefði tekið hvað sem er sem líktist kuðungi. Ég held að þessar bleikjur komi ekki upp á grunnið. Þær líta örðuvísi út en þjóðgarðsbleikjan og halda sig frekar djúpt.“

Ívar segir að með því að veiða af kajak hafi veiðin breyst. Nýir möguleikar og ný ævintýri. Ljósmynd/Aðsend

Bylting að vera á kajak

Ívar segir algera byltingu að vera á kajak. Það hreinlega opnist ný vídd í vatnaveiðinni. „Maður fer á nýja staði og upplifir ný ævintýri.“

Þegar hann reri út frá Heiðabæ 2 var hann í þrjá tíma og skyldi afar sáttur við svæðið.

Við hvetjum veiðimenn til að senda okkur myndir á netfangið eggertskula@mbl.is og láta fylgja með hvar þeir voru, á hvað þeir veiddu og jafnvel eitthvað aðeins meira.

• Blogga um frétt

Seinustu hundraðkallar sumarsins