Hítará uppseld í sumar – alger óvissa

Laxveiðileyfi í Hítará í sumar eru uppseld. Stangveiðifélag Reykjavíkur er með ána á leigu út þetta veiðitímabil. Ari Hermóður Jafetsson, framkvæmdastjóri SVFR, sagði í samtali við Sporðaköst að á þessari stundu væri alger óvissa ríkjandi. „Við bíðum eftir viðbragðsáætlun frá landeigendum og tillögum frá Hafrannsóknastofnun. Það getur tekið einhvern tíma að meta ástandið og möguleg viðbrögð.“

Ari ræddi við kokkinn í veiðihúsinu í hádeginu og þá var ekki að sjá að áhrif hefðu náð niður að veiðihúsinu. Áin var enn í „þokkalegu júlívatni“. Hann sagði lítið hægt að gera annað en bíða og sjá hvað myndi setja.

„Viðbúið er að veiðimenn sem eiga veiði fram undan fari að hafa samband og við reynum að meta stöðuna eins hratt og mögulegt er. En það mun taka tíma,“ sagði Ari.

Aðspurður sagði Ari að engar tryggingar næðu yfir náttúruhamfarir sem þessar. Hann taldi þetta fordæmalaust mál og ótrúlegt að horfa upp á þessa miklu skriðu.

Myndin var tekin rétt fyrir klukkan eitt út um glugga á veiðihúsinu við Hítará. Ljósmynd/Aðsend

• Blogga um frétt

Seinustu hundraðkallar sumarsins