Miðfjörður gaf 73 laxa í gær

Töluvert magn af laxi hefur verið að ganga í Miðfjarðará síðustu sólahringa. Gærdagurinn gaf 73 laxa og er það langbesti veiðidagurinn það sem af er sumri. Rafn Valur Alfreðsson leigutaki segir að mikið sé að ganga af smálaxi og einnig er nokkuð um tveggja ára fisk sem er lúsugur.

„Þetta var algjört Bingó og Gröndal,“ sagði Rafn í samtali við Sporðaköst og var afskaplega sáttur með daginn. Miðfjarðará er að nálgast 700 laxa veiði og er það nokkuð lakara en á sama tíma í fyrra. Rafn Valur segist hafa á tilfinningunni að þetta sé allt aðeins seinna þetta árið. „Mér finnst eins og þetta sé viku til tíu dögum seinna á ferðinni en til dæmis í fyrra.“

Þann 12. júlí í fyrra var veiðin í Miðfjarðará komin í 740 laxa og fór upp í 1.202 laxa 19. júlí. Þannig að sú vika skilaði um 500 laxa veiði. Rafn segir að spennandi verði að fylgjast með næstu dögum en góðar göngur hafi verið í ána síðustu daga og fari vaxandi.

Nýgenginn 92 sentimetra lax sem veiddist á Melabreiðu í Miðfjarðará. Veiðimaðurinn er Angus Woolhouse. Ljósmynd/Aðsend

• Blogga um frétt

Seinustu hundraðkallar sumarsins