Klerkurinn og stórlaxinn

Gunnlaugur Stefánsson prestur í Heydalaprestakalli landaði 102 sentímetra hæng úr Svartá í Húnavatnssýslu á dögunum. Veiddist stórlaxinn á ómerktum stað og er óhætt að segja að nokkur heppni hafi verið yfir þessari veiði.

Gunnlaugur var ásamt félaga sínum við veiðar býsna fjarri heimaslóðum en prestakallið er á Austfjörðum og nánast á bökkum Breiðdalsár. Gunnlaugur ásamt Guðmundi Ólasyni frá Hrólfsstöðum í Jökuldal og veiðistjóra við Jöklu höfðu trassað að loka hliði á eftir sér. Bóndinn á Eiríksstöðum kom aðvífandi og bað þá um að loka hliðinu meðan að þeir veiddu. Það var auðsótt mál. „Guðmundur bóndi á Eiríksstöðum tók tal við okkur og benti okkur á ómerktan stað sem væri fyllsta ástæða til að kasta á. Við tókum hann að sjálfsögðu á orðinu og ég setti undir litla Bismo og nánast í fyrsta kasti tók þessi líka hængurinn,“ sagði Gunnlaugur í samtali við Sporðaköst.

Viðureignin var löng og ströng enda mikið vatn í Svartá og barst leikurinn nokkuð niður eftir ánni. „Ég hefði aldrei landað honum einn. Ef Guðmundur veiðistjóri hefði ekki verið með mér hefði ég aldrei náð honum,“ sagði klerkur. Fiskurinn mældist 102 sentímetrar og var svo sannarlega hápunktur veiðiferðarinnar.

• Blogga um frétt

Seinustu hundraðkallar sumarsins