Fín veiði í Reykjadalsá

Laxveiði í Reykjadalsá í Borgarfirði hefur verið með besta móti það sem af er sumri en hún hefur í gegnum tíðina helst verið þekkt sem mikil síðsumarsá.

Samkvæmt upplýsingum frá Stangveiðifélagi Keflavíkur, sem hefur haft veiðirétt í ánni um áratuga skeið, voru um miðja síðustu viku komnir 128 laxar á land.

Veitt er á tvær stangir í ánni og þetta verður að teljast góð veiði því aðalveiðin í gegnum árin hefur yfirleitt verið í haustrigningum frá seinni hluta ágúst og september.

Nú í sumar hefur verið nóg af vatni og er fiskurinn því töluvert dreifður um ána. Vatnið hefur jafnvel stundum verið það mikið að mönnum hefur þótt það of mikið af því góða.

Það hefur verið ævintýraleg veiði á köflum og fékk eitt tveggja daga holl um miðjan júlí 31 lax á stangirnar tvær sem dreifðust frá neðstu veiðistöðum alveg upp í Giljafoss sem er efsti veiðistaður árinnar.

Sumarið 2017 var heildarveiðin 242 laxar og þar af gaf september einn 140. Meðalveiði síðustu árin hefur verið rétt um 200 laxar, en metveiði var sumarið 2013 þegar 355 laxar veiddust.

Fallegur lax sem kom úr Mjónesál á dögunum. Ljósmynd/SVFK

• Blogga um frétt

Seinustu hundraðkallar sumarsins