Batamerki á bleikju í Eyjafjarðará

Eyjafjarðará er að rétta úr kútnum eftir mikla niðursveiflu í mörg ár. Sterk opnun á efstu tveimur svæðunum nú um mánaðamótin talar sínu máli. Fjórða og fimmta svæðið eru efstu svæði árinnar og var eitt magnaðasta bleikjusvæði á landinu.

Jón Gunnar Benjamínsson þekkir Eyjafjarðará eins og puttana á sér og hann fór til veiða fyrstu dagana sem svæði fimm opnaði. „Ja eigum við ekki að segja að hún sýni nokkuð jákvæð batamerki eftir gríðarlega niðursveiflu undanfarinna ára þótt hún eigi langt í land með að ná fyrri hæðum?“ sagði Jón Gunnar í samtali við Sporðaköst. Hann var við veiðar ásamt ungum efnilegum veiðimönnum, afkomendum Gylfa Kristjánssonar heitins.

Birkir Björnsson með um 70 sentimetra bleikju úr Eyjafjarðará. Þessi stærð er gjarna kölluð kusa. Ljósmynd/Aðsend

Kusurnar mættar

Stóra bleikjan sem veiðimenn sækjast eftir á þessu svæði lét svo sannarlega sjá sig og þó nokkrar á bilinu 60 til ríflega 70 sentimetrar veiddust. Það eru hinar svokölluðu „kusur“ og þær halda sig mest í efsta hluta árinnar.

Jón Gunnar sjálfur landaði einni slíkri á Jökulbreiðu og sagði hann hefðbundna kúluhausa helst vera að virka. Hann nefndi til sögunnar, „Pheasant Tail, Krók, Mýslu og flugurnar hans Sveins Þórs, Prestinn, Rolluna og annað sem kalla má hefðbundna kúluhausa. Silfurperlan er líka sterk.“

Jón Gunnar með stærstu bleikju sem hann hefur veitt í Eyjafjarðará í gamla daga. Þessi var 74 sentímetrar og 4,6 kíló. Ljósmynd/Aðsend

Takan hefur aðeins dottið niður eftir þessa sterku opnun, en það var eitthvað sem mátti búast við.

Einungis er veitt í mánuð á efstu svæðum árinnar frá 1. ágúst til loka mánaðar. Skylt er að sleppa öllum bleikjum á efstu tveimur svæðunum. Af þessu má sjá að veiðifélagið er enn að styðja við bleikjuna á þessu svæði en hér á árum áður var bleikjan ofveidd í efri hluta Eyjafjarðarár.

• Blogga um frétt

Seinustu hundraðkallar sumarsins