SVFR leigir Laugardalsá

Samkvæmt upplýsingum frá Stangveiðifélagi Reykjavíkur hefur félagið samið við Veiðifélag Laugardalsár í Ísafjarðardjúpi um veiðirétt næstu fjögur sumur.

Stangveiðifélag Reykjavíkur fær öll veiðiréttindi á vatnasvæðinu, auk þess sem samið var um leigu á silungsveiðivötnunum Laugarbólsvatni og Efstadalsvatni sem áin rennur úr.

Laugardalsá er 16 km löng og rennur úr Laugarbólsvatni, niður Laugardal og til sjávar við vestanverðan Mjóafjörð. Seldar eru í ána 2 stangir í júní og september, en 3 stangir eru í ánni í júlí og ágúst.

Einungis er veitt á flugu í Laugardalsá og hefur meðalveiði síðastliðin 10 ár verið um 350 laxar, en var mest 2015 þegar hún endaði í 521 laxi. Rúmlega 130 laxar eru komnir á land það sem af er sumri samkvæmt síðustu fréttum þaðan.

Í yfirlýsingu frá Jóni Þór Ólafssyni til félagsmanna kemur meðal annars fram að félagið hafi heitið því að leggjast á árarnar með bændum og landeigendum í baráttunni gegn laxeldi í opnum sjókvíum en fyrirætlanir um laxeldi í Ísafjarðardjúpi hafa verið nokkuð til umræðu á undanförnum árum. Stangveiðifélagið leggst alfarið gegn slíkum hugmyndum, enda eru þær mikil ógn við lífríki svæðisins og laxastofna á svæðinu.

• Blogga um frétt

Seinustu hundraðkallar sumarsins