Staðfest að um eldislax var að ræða í Selá

Lax sem veiddist fyrir landi Ármúla í ósi Selár í Ísafjarðardjúpi 24. júlí síðastliðinn var eldislax af norsku kyni og reyndist vera kynþroska hængur með svilasekki og hefði þannig verið tilbúinn til þátttöku í hrygningu nú í haust að mati sérfræðinga.

Samkvæmt frétt frá Landssambandi veiðifélaga var um að ræða 63 cm hæng sem vigtaði 4,2 kíló. Hann var með áberandi skemmdan sporð og ugga. Þá kom í ljós við rannsókn að hann var með samgróninga sem afleiðingu bólusetningar sem hann hefur fengið.

Þetta mun vera annað sumarið í röð sem staðfest er að eldisfiskur veiðist fyrir landi Ármúla, en sumarið 2017 veiddist þar regnbogasilungur.

Selá er ein af vatnsmestu ám á Vestfjörðum og á upptök sín á Ófeigsfjarðarheiði og í Drangajökli í um 500 metrum yfir sjávarmáli. Að meðaltali veiðast rúmlega 30 laxar á sumri í ánni og nokkur hundruð sjóbleikjur.

Fram kemur að sumarið 2017 hafi veiðst fyrir landi Ármúla um 130 sjóbleikjur á tveggja mánaða tímabili og hefur veiðin nú í sumar verið heldur meiri.  Veitt er í eitt net helming vikunnar.

Hafa landeigendur Ármúla ítrekað krafist þess af Umhverfisstofnun að stofnstærð sjóbleikjunnar í Ísafjarðardjúpi verði rannsökuð nánar og farleiðir hennar þannig kortlagðar til þess að unnt sé að meta umhverfisáhrif sjókvíaeldis í Ísafjarðardjúpi á stofninn, meðal annars með tilliti til mengunar og slysasleppinga.  Hefur þessu alltaf verið hafnað og án sérstaks rökstuðnings að mati landeigenda.

• Blogga um frétt

Seinustu hundraðkallar sumarsins